Psalms 32:1-11

¹Ba felan’ e cha’ nike n’ag Got fan e denen rok, ni kireb rok e ke thang Got.

²Ba felan’ e en ndakir yog SOMOL ngak ni be rin’ e kireb; ma kar waergow urngin mit e sabanban.

³Ngiyal’ ni ndawor gu weliy e denen rog ngak SOMOL e m’ay gelngig ni bochan e meyor ni ug tay ni kadbul nge nep’.

⁴Ya mu gechig nigeg ni rran nge nep’, I gur SOMOL; mu gu par ni kari m’ay gelngig, ni bod e wa’angachal ni mlik’nag e yal’ u ngal’an e gowel.

⁵Ma aram mu gu weliy e denen rog ngom; da gu mithag rom e tin kireb ni ku gu rin’. Gu turguy u wun’ug ni nggu weliy e pi denen rog ngom, ma ga n’ag fan urngin e kireb rog.

⁶Ere urngin e girdi’ rom nib yul’yul’ ngom e thi’ngar ra meybilgad ngom ko ngiyal’ ni kari t’uf e ayuw rorad; ra yib e gafgow ni bod e ran nga daken e binaw nib machreg, ma dabi taw ngorad.

⁷I gur e gu ma mith nga fom; bay mu chuwegneg u fithik’ e oloboch. Gu be tangnag ni ba ga’ lamag rogon ni ga ma ayuwegney, ni bochan e gur e ka mu yororiyeg.

⁸Be ga’ar SOMOL, “Bay gu fil ngom e kanawo’ ni ir e ngam man riy; bay gog ngom e tin ngam rin’ ma bay gu fonow nigem.

⁹Dab mu boded ba os ara ba gamanman ni mule nib minan’, nochiyang i wasey ni bay gafan e thingar ni tay ngalan l’ugun ni ir e nge fol riy.”

¹⁰Pi’in kireb e ri yad ra gafgow, ma pi’in nib pagan’rad ngak SOMOL e be yororiyrad ko t’ufeg rok ni dabimus.

¹¹Gimed e pi’in gimed mmat’aw, e nge felan’med mi gimed uf ni bochan e n’en ke rin’ SOMOL! Gimed e pi’in gimed be fol rok, e ngam tolul niged e felfelan’!