GWAY GI IDAWUU’D 32:1-11

¹Mom’bor mii gom a’di jin gwamkunu gwon dhaŋ piti mo, a’di jin ta miinthus piti jin kumkunu ’kup̱ mo.

²Mom’bor mii gom wathi/ jin dina Tap̱a ki yer is ki gway gom miinthusa kamu/ mo, dhali e shi/in piti mo tani mo ma he’k e p̱iyi’d mo.

³Ki aha/ dinaki ṯor gwo miinthus pem mo tani buŋgwar is pem a’di muṯṯi’di ’baar mo e mo/ohon pem ka tee ’baar mo.

⁴Haali/ montee dhali mon’thiny mo tani me’d pini diṯadiṯ ap̱o/ aha/ mo. Mom’bi’th pem a’di ḵu’thki’d mo me’d mom’batha’d jin ’koshki to moyurantee mo. Doshi ma dhali ’cunycuri yan mo.

⁵Aha/ nyiṯẖkina miinthus pem e /e mo dhali aha/ dinaki bag miinthus pem mo. Aha/ ona gwo mo ki: Aha/ mina pi gwon dhaŋ pem ki Tap̱a mo. Dhali yan’ko’d /e gwamki aha/ gom miinthus jin di aha/ i’ba/ mo. Doshi ma dhali ’cunycuri yan mo.

⁶Wakan dhalka ris ’kwani ’baar mo kun tana gayiin ’thon e /e mo. Ka tee ma c̱is mo, dhali ka tente/ kun sona dhan yi’de/ mo tani uni mol a’di gam mo.

⁷/E ta mombag gom aha/ mo dhali /e ’tashki aha/ ’twa/ mo ’peni monṯo’c bwa mo. Dhali /e ’kamki aha/ ki mony’cuḵ mo. Doshi ma dhali ’cunycuri yan mo.

⁸Aha/ mina ye’th /e sho’k mo dhali ṯor /e bway jin mina /e iya mo be. Aha/ mina logom /e ki gwo mo ki em pem jin midi di ap̱o/ /e mo.

⁹Dhalku/ ki wa e ki shumarum walla bagal kun mol ’twa/ wal mo, uni kun minu ’kali’th is mo dhali ’kamu’th ’twa/ ka lijaam mo isi ciki/ ki uni mini ’koki so ’peni /e mo.

¹⁰To kun diṯ bwa gom ’kwani kun ta thus ki thus mo tani uni tana ris mo, hili mo/en jin ṯeli sho’k mo a’di ’kam a’di is mo a’di jin gamki gwo is e Tap̱a mo.

¹¹’Bori bwa e Tap̱a mo dhali ’kunyi bwa mo ayy um ’kwani kun tana ḵar/e mo, dhali ḵumi cuuwa/ gom moŋ’kuny bwa mo, aris um kun dhelel ma du mo.