Pesalem 32:1-11

¹Aweŋ êôc ŋac, taŋ Anôtô kêsuc ênê sec ôkwi to kêgadu ênê geo auc naŋ.

²Aweŋ êôc ŋac, taŋ Anôtô taê gêjam ênê keso atom ma biŋdansaŋ gêc ênê ŋalêlôm atom naŋ.

³Gêdêŋ taŋ gajam tauc tôŋ naŋ, ŋoc ôlicwalô gêbacnê gebe kataŋ taŋiboa kêtom bêcgeŋ.

⁴Gebe lêmam gêsac aê ma kôkôniŋ aê kêtôm bêc to geleŋgeŋ. Ŋoc ŋalêlôm ŋakeleŋ kêsa kêtôm oc kêpac mêckelep e ŋakeleŋ kêsa.

⁵Amboac tonaŋ tec gaoc ŋoc biŋ lasê gêdêŋ aôm ma gasaŋ ŋoc geo auc atom. Aê kasôm gebe “Jaoc ŋoc biŋ keso lasê êndêŋ Apômtau,” tec aôm kôsuc ŋoc geo ŋatôp ôkwi.

⁶Amboac tonaŋ lau mansaŋ samob teteŋ êndêŋ aôm, êndêŋ têm sêpô lêna tauŋŋa. Ec embe ŋasamac sec ênsalê auc êmêŋ, naŋ êtap êsêac sa atom.

⁷Aôm kôtu ŋoc gamêŋ jasiŋ taucŋa. Aôm gojob gêdêŋ taŋ gamoa jageo naŋ. Nêm moasiŋ gôjam aê kêsiŋa kêkôm aê auc.

⁸“Aê gabe jandôŋ to jatôc intêna ôsaŋa êndêŋ aôm. Aê matoc êndiŋ aôm ma jawa aôm.

⁹Ôtôm hos me doŋki kaucmê atom. Embe gôliŋ to gôliŋ ŋamôkê êsêp awasuŋ atom, oc taŋa wamu aôm atom.” Apômtaunê biŋ tonaŋ.

¹⁰Ŋac alôb-alôb kêtap gêŋwapac taêsam sa. Ma ŋac, taŋ mata kêsap Apômtau tôŋ naŋ, Apômtaunê têtac gêwiŋ teŋgeŋŋa êkwa eŋ auc.

¹¹O lau gêdêŋac, ôlim êpi totêmtac ŋajamgeŋ êtu Apômtauŋa. Ma amac samob, taŋ nêm ŋalêlôm ŋaŋêŋ naŋ, atu samuc toôndugeŋ.