Psalms 22:1-12

¹Got rog, Got rog, mang ni kam n’igeg? Kari gu wenig ngom u fithik’ e gel’gel’ ni ngam ayuwegneg, ma ka dawori taw e ayuw rom ngog!

²Ra rran mu gu piningem, I gur Got rog, machane damur fulweg lamag; gu be piningem nnep’, ma daryag ni nggu toffan.

³Ga bay u tagil’im, ni gur fa’anem ni gab thothup, ni gur e ma pining piyu Israel e sorok ngom.

⁴Pi chitamangimad e ur pired nib pagan’rad ngom; ur pired nib pagan’rad ngom mu’um yororiyrad.

⁵Rpininged gur miyad thay ko riya’; I pagan’rad ngom ma de m’ingan’rad.

⁶Machane gathi ka gag ba girdi’, ya kug par ni gu ba ololay, ndakuriy fag u wan’ urngin e girdi’ ma yad be moning nigeg!

⁷Urngin e girdi’ ni yad ra guyeg miyad moning nigeg; miyad pi’ bolowthrad nga tamilang ngar chingchingeged lolugrad ngog me lungurad,

⁸“Kam gif ngak SOMOL, ere mang ndabi ayuwegnem? Fa’anra ga bfel’ u wan’ SOMOL, me ere mang ndabi ayuwegnem?”

⁹I gur e mu gagiyegnag ni nga ni gargel nigeg ni bfel’ rogog, ma nap’an ni ku gub ran ma ga yoror rog nde buch ban’en rog.

¹⁰Kug par ni gu be toer ngom ni ka nap’an e ngiyal’ nni gargel nigeg riy; ma ka aram nap’an i yib ni ga be par ni gur e Got rog.

¹¹Dab mu par u orel rog! Ya ke chugur e oloboch, ma dariy be’ nra ayuw.

¹²Pire’ e to’ogor ni ka ra yin’edgag nga longob ni yad bod e garbaw ni pumo’on, go’ ka ra liyegedgag, ni bod fapi garbaw ni pumo’on ndamumuw nu Bashan.