Psalms 18:22-50

²²Pwe a majan akan mi mo i, o i jota pan kaje jan ia a kujoned akan.

²³Pwe nai unjokalar mon jilan i o juedeki ai japun.

²⁴O Ieowa kotin katini on ia duen ai pun, o duen makelekel en pa i kan mon jilan i.

²⁵Komui me kalanan on me mau kan, o lelapok on me lelapok kan,

²⁶O makelekel ren me makelekel akan, o japun ren me japun kan.

²⁷Pwe kom kin kotin dorela aramaj luet akan, ap kadukiedi maj en me aklapalap akan.

²⁸Pwe kom kin kotin kamaraini ai lamp, Ieowa ai Kot kin kamaraini ai rotorot.

²⁹Pwe ni ai ian komui i kak kaloedi karij en jaunpei kan, o ni ai ian ai Kot, i kak lujwei pon kel takai.

³⁰Al en Kot me unjokala; majan en Ieowa me makelekel. I pere pan karoj, me liki i.

³¹Pwe ia amen Kot impan Ieowa, de ia paip eu impan atail Kot?

³²Iei Kot, me kotin aude kin ia manaman, o kaunjokala al ai.

³³A kin kotin wiai on nä i kan dueta nä en tia, o kotin kajapwil ia dan waja ileile.

³⁴A kotin padaki on pa i kan tiak en mauin o, pwen kak on kaonopada kajik katieu mata.

³⁵Kom kotiki on ia pere pan maur omui, o lim omui pali maun kamana ia da, o omui opampap me kajapwil ia da.

³⁶Kom kotin kaonopadar al, me i pan weweid ia, pwe nä i kan ender krijedi.

³⁷I pan tan won ai imwintiti kan o kono irail edi, o i jota pan puredo, lao karoj lodier.

³⁸I pan kamor irail pajan, re jota pan kak palian ia, o re pan pupedi on pan nä i kan.

³⁹Kom kak kamana kin ia omui manaman on ni pei; Kom kak kajedi on pan nä i kan karoj me palian ia.

⁴⁰Kom kin kotin kaloedi on ia ai imwintiti kan, pwen kawela, me kailon kin ia.

⁴¹Re kin likelikwir, a jota jauaj parail ren Ieowa, a jota kotin japen ir.

⁴²I pan juk irail pajan dueta pwel par nan kijinian; i pan kaje ir ala dueta pwel jamin jan nani al o.

⁴³Kom kin kotin dore ia jan ren akamai en aramaj, o kom kotin kajapwil ia dan men liki kan; o wei eu me i jaja kin upa on ia.

⁴⁴Ni ar roner, re peiki on ia er, o nain men wai kan peikion ia ni linkapin.

⁴⁵Nain men wai kan poridier o rerer o pwarado jan nan ar im kalaimun akan.

⁴⁶Ieowa kotin ieiaj; kapin on ai paipalap; o kapin on Kot ai jaundor.

⁴⁷Kot me kotin depuk on ai imwintiti kan, o a kotin kaloedi on ia ai imwintiti kan;

⁴⁸Kom kotin dore ia la jan ai imwintiti kan, o kom kotin kajapwil ia dan ir, me palian ia. Kom kin kotin jauaja ia on me morjued on ia.

⁴⁹I me i men danke komui, Main Ieowa, nan pun en men liki kan o kauleki duen mar omui,

⁵⁰Komui me kotin kamaurada melel japwilim a nanmarki o a kotin jauaja mau japwilim a Dawid keiedier o kadaudok a kokolata.