Psalms 119:34-125

³⁴Kotin padaki on ia, pwe i en kolekol omui kapun o peiki on jan nan monion i.

³⁵Kalua ia nan al en omui kujoned akan, pwe i kin peren kin irail.

³⁶Kainonion monion i omui kadede kan, a der norok moni.

³⁷Pirer wei maj ai, pwen der kilan me jued kot; a re kotin kakel ia da pon al omui.

³⁸Kolekol omui inau on japwilim omui ladu, pwe i en majak komui.

³⁹Kotiki jan ia namenok, me i juedeki; pwe omui kujoned akan me mau.

⁴⁰Kotin mani, i kin inon ion ar majan akan; kakele kin ia omui pun.

⁴¹Main Ieowa, kom kotin maki on ia, o kotin jauaja ia duen omui inau.

⁴²Pwe i en aja, japen ir, me mamale kin ia, pwe i kin liki omui majan.

⁴³O kom der kotiki jan au ai majan en omui melel; pwe i kaporoporeki omui kujoned akan.

⁴⁴I pan kolekol omui kapun o anjau karoj kokolata.

⁴⁵I pan weweid ni peren, pwe i raparapaki omui kujoned akan anjau karoj.

⁴⁶O i pan kajokajoi on nanmarki kan duen omui kadede kan, ap jota namenok.

⁴⁷Pwe i kin peren kida omui kujoned akan, o i kin pok on ir.

⁴⁸I kin pokadan pa i kat omui kujoned akan, me i pok on, o i pan madamadaua duen omui kujoned akan.

⁴⁹Kotin tamanda japwilim omui ladu, duen omui majan, me i kin kaporoporeki.

⁵⁰I me kin kamait ia la ni ai luet; omui ianu kan kin kakel ia da.

⁵¹Me aklapalap akan kin mamale kin ia; ari jo, i jota kin muei jan omui kapun o.

⁵²Main Ieowa, ma i lamelame duen omui kujoned akan jan nin tapin jappa, i ap injenemau kila.

⁵³I makar kila me doo jan Kot akan, me kin muei jan japwilim omui kapun o.

⁵⁴Omui kujoned akan, iei ai kaul en kapin nan ai im en kairu.

⁵⁵Main Ieowa, ni pon i kin madamadaua duen mar omui, o peiki on omui kapun.

⁵⁶Mepukat wiaui on ia er, pweki ai peiki on omui kujoned akan.

⁵⁷Main Ieowa, iet pwaij ai, en kolekol omui majan kan.

⁵⁸I kin nidinid on komui jan nan monion i; kom kotin maki on ia duen omui inau o.

⁵⁹I kin madamadaua duen al ai, ap kainen won omui kadede kan nä i kat.

⁶⁰I kin nantion o jota pwapwand kolekol omui kujoned akan.

⁶¹Pwin en me doo jan Kot akan kapil ia pena, ari jo, i jota monokela omui kapun kan.

⁶²Ni ailep en pon i kin paurida, pwen danke komui, pweki omui kujoned pun.

⁶³I kin waroki on ir karoj, me majak komui o ir, me apapwali omui kujoned akan.

⁶⁴Main Ieowa, jappa direki omui kalanan; padaki on ia omui kujoned akan.

⁶⁵Main Ieowa, komui me kotin wiai on japwilim omui ladu kamau kan duen omui inau o.

⁶⁶Padaki on ia tiak mau o lolekon, pwe i kin liki omui kujoned akan.

⁶⁷Mon ai aktikitikala, i kin japujapun, a met i kin apapwali omui majan.

⁶⁸Komui me mau o kapunlol, kotin padaki don ia japwilim omui kujoned akan.

⁶⁹Me aklapalap akan kin kalikama ia; a nai kin apapwali omui kujoned akan jan nan monion i.

⁷⁰Monion arail majul kila wi; a i kin peren kida omui kapun.

⁷¹Meid mau on ia omui kaopampap ia la, pwe i en padakki omui kujoned akan.

⁷²Kapun jan nan jilan omui mau on ia, jan kold o jilper kid toto.

⁷³Lim omui kan kapik o wia ia dar, padaki on ia, pwe i en aja omui kujoned akan.

⁷⁴Me kin majak komui, pan kilan ia, ap peren kida, pwe i auiaui omui majan.

⁷⁵Main Ieowa, i aja, me omui kadeik kan me pun, o kom kotin kaopampap ia la ni omui melel.

⁷⁶Omui mak pan kamait ia la, duen me kom kotin inauki on japwilim omui ladu.

⁷⁷Kom kotin kupura ia, i ap pan memaur eta, pwe i kin peren kida omui kapun.

⁷⁸Me aklapalap akan en jarodi, pwe re japun on ia ni jokarepa; a nai madamadaua duen omui kujoned akan.

⁷⁹Me majak komui, ren waroki on ia, o me aja duen omui kadede kan.

⁸⁰Monion i en pun ni omui kujoned akan, pwe i ender jarodi.

⁸¹Nen i kin inon ion omui dore ia la, i auiaui omui majan.

⁸²Por en maj ai kin anane omui inau, kalelapok: Iad me kom pan kotin kamait ia la?

⁸³Pwe i luetalar rajon deun pil eu nan adiniai, i jota monokela omui kujoned akan.

⁸⁴Arai da, japwilim omui ladu pan memaurada? Iad me kom pan kotin kadeikada ai imwintiti kan?

⁸⁵Me aklapalap akan weiradan ia por akai, irail me jota kin duki on japwilim omui kapun o.

⁸⁶Japwilim omui kujoned akan karoj me melel. Irail raparapa kin ia ni jota karepa; kom kotin jauaja ia!

⁸⁷Me ekij, re pan kame ia la jan nin jappa, a nai jota muei jan omui kujoned akan.

⁸⁸Kamaur ia da duen omui kalanan, a nai pan kolekol kadede en jilan omui.

⁸⁹Main Ieowa, omui majan pan potopot eta nanlan.

⁹⁰Omui melel kin jan eu kainok lel eu; komui me kotin kajonedier jappa o a pan mimieta.

⁹¹Irail karoj mimieta lao lel ran wet, duen omui kujoned akan, pwe karoj kin upa komui.

⁹²Ma omui kapun jota pan kaperen pa i, i pan mela ni ai luet.

⁹³I jota pan monokela omui kujoned akan kokolata, pwe ir me komui kakela kin ia da.

⁹⁴Nai japwilim omui, kom kotin jauaja ia! Pwe i inon ion japwilim omui kujoned akan.

⁹⁵Me doo jan Kot akan majamajan ia, pwen kame ia la; i kin apwali omui kadede kan.

⁹⁶I kilaner imwin meakaroj, a japwilim omui kujoned pan mimieta.

⁹⁷Ia wan ai pok on japwilim omui kapun! Nin ran karoj i kin kajokajoi due.

⁹⁸Kom kin kalolekon kin ia omui kujoned akan jan ai imwintiti kan, pwe irail pan ieian ia kokolata.

⁹⁹Nai lolekon jan ai jaunpadak kan karoj, pwe i kin madamadaua duen omui kadede kan.

¹⁰⁰Nai lolekon jan me ma kan, pwe i kin apapwali japwilim omui kujoned akan.

¹⁰¹I jota mueid on nä i, en weweid pon al japun, pwe i en kolekol omui majan.

¹⁰²I jota wuki wei jan omui kujoned akan, pwe kom kotin padaki on ia er.

¹⁰³Omui majan me iau jan onik nan au ai.

¹⁰⁴Omui kujoned akan kin kalolekon ia, i me i kin tataki al japun karoj.

¹⁰⁵Japwilim omui majan me jer pan nä i, o kamarain pan al ai.

¹⁰⁶I kaukilar, me i pan kolekol omui kujoned pun kan, o i pan kapwaiada.

¹⁰⁷I injenjued melel; Main Ieowa, re kotin kamaur ia da duen omui inau.

¹⁰⁸Main Ieowa, kom kotin kupura kijakij en au ai, o kotin padaki on ia omui kujoned akan.

¹⁰⁹I kin wewa maur i nan pa i kat; i jota monokela omui kapun.

¹¹⁰Me doo jan Kot akan injenjare ia, a i jota wuki wei jan omui kujoned akan.

¹¹¹Omui kadede kan iei ai jojo joutuk, pwe re kaperenda monion i.

¹¹²Monion i kin inon ion kapwaiada omui kujoned akan anjau karoj kokolata.

¹¹³I kin kailonki me lol riapot, o i kin pok on omui kapun.

¹¹⁴Komui ai kadauk o pere pa i, i kaporoporeki omui majan.

¹¹⁵Komail me jued akan en muei jan ia! I men apapwali kujoned en ai Kot akan.

¹¹⁶Jauaja ia duen omui inau, i ap pan memaur eta; o kom der kotin mueid on, i en namenokala ni ai kaporopor.

¹¹⁷Kamana ia da, i ap pan kelailada, i ap pan apapwali omui kujoned akan anjau karoj.

¹¹⁸Kom kin kotin tiakedi karoj, me pan wuki wei jan omui kujoned akan; pwe arail japun me dir en likam.

¹¹⁹Kom kin kotin kaje jan jappa me doo jan Kot akan karoj dueta jamit; i me i kin pok on ki omui kadede kan.

¹²⁰I kin majak komui, i me i kin mujerereki, o i kin majak omui kadeik kan.

¹²¹I kin apapwali me inen o pun; kom der kotin pan ia lan ren me kin wia jued on ia.

¹²²Jauaja japwilim omui ladu o kamaitala i; me aklapalap akan ender jued on ia.

¹²³Por en maj ai inon ion omui kamaur ia, o omui inau pun.

¹²⁴Wia on japwilim omui ladu duen omui kalanan, o kotin padaki on ia omui kujoned akan.

¹²⁵Nai japwilim omui ladu; kotin padaki on ia, pwe i en dedeki japwilim omui kadede kan.