Mboe 119:34-125

³⁴Kam leŋ ŋgar pa sua ta nu kam piam. Naso motoŋ iŋgalŋgal, mi aŋtoto raama leleŋ.

³⁵Pazal yo be aŋto zaala ki tutu ku. Pa zaala tana, ta ko ikam yo ma leleŋ ambai kat.

³⁶Zaala ta nu ur pa wal ku na, kam yo ma aŋur kat leleŋ pa ka tutu. Kokena motoŋ koroŋŋoŋ mi aŋru zaala be aŋdoundou leŋ koroŋ boozo.

³⁷Kam yo ma aŋpiŋgis motoŋ pa koroŋ soroksorok ki toono ta ŋonon somŋan i. Pombol yo be aŋto zaala ku. Naso kam yo ma aŋbot ambai mini.

³⁸Nio mbesooŋo ku tau. Tana motom iŋgal sua ta mbuk pio na, mi kam ma iur ŋonoono. Sua tana, nu kam pa wal boozomen ta timototo u mi tileŋleŋ la kalŋom na.

³⁹Nio aŋmoto sua repiiliŋana mi pamiaŋŋana ki koŋ koi bizin. Tana piŋgis sua kizin tana pio. Pa kadoono ta urur pizin tomtom, ina indeŋdeeŋe men.

⁴⁰O Yooba, nio leleŋ ilip pa sua boozomen ta ur na. Tana to mbulu ku ndeeŋeŋana, mi uulu yo ma aŋbot ambai mini.

⁴¹O Yooba, nu toto sua ku mbukŋana mi urur lelem pa wal ku. Swe mbulu ku tana pio. To itum kalŋom, mi kamke yo.

⁴²Naso aŋrao be aŋpekel sua repiiliŋana ta tomtom tiwirri pio na. Pa nio aŋpase pa sua ku.

⁴³Nio aŋurur motoŋ pu be to tutu ku ndeeŋeŋan mi uulu yo. Naso aŋwit urum pa mbulu ku ta zzo sua ŋonoono men mi toto sua ku. Tana re: Kokena uulu yo som, to aŋrao aŋso sua sa mini pa mbulu ku tana som.

⁴⁴Sua ta nu kam piam na, nio ko aŋtoto totomen.

⁴⁵Nio aŋkam kinkiini be aŋto sua boozomen ta nu ur na. Tana kosa sa ko irao be ipakaala zaala pio mini na som.

⁴⁶Nio ti aŋmoto som, mi koŋ miaŋ pizin tomtom som. Zaala ta ur pa wal ku na, nio ko aŋsoyaara ka tutu ila zin king keren uunu.

⁴⁷Pa tutu ku ta ikam yo ma leleŋ ndabok kat. Tana leleŋ pa ilip.

⁴⁸Nio aŋwit nomoŋ isala, mi aŋpakuru pa sua ku. Mi motoŋ lala pa tutu ku ta tibeede pataaŋa kek na, mi aŋkamam ŋgar pa.

⁴⁹Nio mbesooŋo ku. Tana motom iŋgalŋgal sua ku mbukŋana ta kam pio na. Pa ina ipombolmbol yo be aŋur motoŋ pu mi aŋsa ulaaŋa ku.

⁵⁰Sombe pataŋana ikam yo, na sua ku ko iuulu yo be aŋbot ambai. Ŋgar tana, ta ipotor leleŋ.

⁵¹Zin wal ta tipakurkur zitun mi tirepilpiili Anutu na, timbel sua repiiliŋana pio. Tamen sua ta nu kam piam na, aŋzem som.

⁵²O Yooba, nio motoŋ ŋgalŋgal tutu ku ndeeŋeŋan ta ur muŋgu kek na. Tabe ipombol yo mi ipotor leleŋ.

⁵³Nio, sombe aŋre zin wal sananŋan tipizil ndemen pa sua ta nu kam piam, ina ikam yo ma keteŋ malmal kat.

⁵⁴Toono ti, kar tio ŋonoono som. Iŋgi aŋwe leembe pa men. Mi mazwaana ta so aŋbotmbot su toono ti na, nio ko aŋpakurkuru pa tutu ku ta tibeede pataaŋa kek na, mi aŋbombo mboe pa.

⁵⁵Yooba, mbeŋ tomini, motoŋ iŋgalŋgalu, mi leleŋ be aŋto sua ta nu kam piam na.

⁵⁶Tana nio aŋkamam ta kembei: Sua boozomen ta nu ur na, motoŋ iŋgalŋgal mi aŋtoto.

⁵⁷O Yooba, nio aŋre u kembei koroŋ tio ŋonoono. Pa nu kampewe yo, mi aŋbotmbot se ku pa koroŋ ta boozomen. Tana aŋbuk sua pu be aŋto sua ku.

⁵⁸Iŋgi suŋŋana tio ima ku raama leleŋ: To sua ku mbukŋana, mi kampe yo mi muŋai yo. Pa nio mbesooŋo ku tau.

⁵⁹Nio aŋkam ŋgar pa zaala ta aŋtoto i, tana aŋtooro yo mi aŋso aŋto zaala ta nu ur pa wal ku na.

⁶⁰Mi irao aŋnaunau na som. Ko aŋmaŋga mi aŋto tutu ku pataaŋa.

⁶¹Zin wal sananŋan tiur kilis boozo be tikeene yo. Tamen motoŋ mbeleele sua ta nu kam piam na som.

⁶²Nio aŋmaŋgaŋga pa mbeŋ lukutuunu, mi aŋpakurkuru pa tutu ku ndeeŋeŋan.

⁶³Zin wal ta timototo u mi tileŋleŋ la kalŋom na, nio leleŋ pizin mi aŋgabgaaba zin.

⁶⁴O Yooba, mbulu ku ta toto sua ku mbukŋana mi urur lelem pa wal ku, ina nu zzwe ma irao toono ta boozomen. Paute yo pa tutu ku ta tibeede pataaŋa kek na, bekena aŋute kat.

⁶⁵O Yooba, nio mbesooŋo ku. Mi nu toto sua ku mbukŋana, mi kamam mbulu ambaiŋana pio.

⁶⁶Paute yo pa ŋgar ku, mi kam leŋ ŋgar ambaiŋana. Pa nio aŋpase pa tutu ku.

⁶⁷Muŋgu nio aŋpaŋobŋoobo pa zaala ku. Mi nu balis yo mi pazal yo, tana koozi motoŋ iŋgalŋgal sua ku mi aŋtoto.

⁶⁸Nu ambaiŋom kat. Mi mbulu ta kamam ta kembena, ina ambai men. Paute yo pa tutu ku ta tibeede pataaŋa kek na.

⁶⁹Zin wal ta tipakurkur zitun mi matan pasomu na, tiŋgalŋgal sua pakaamŋana pio. Tamen nio aŋur leleŋ imap pa sua ta nu ur na, mi motoŋ iŋgalŋgal mi aŋtoto.

⁷⁰Wal tina len ŋgar somŋan, mi tiyamaana sanaana kizin som. Mi nio na, sua ta nu kam piam, ta ikam yo ma leleŋ ambai kat.

⁷¹Pataŋana ta muŋgu ikam yo na, koroŋ ambaiŋana. Pa ipazal yo mi ipei ŋgar tio pa tutu ku ta tibeede pataaŋa kek na.

⁷²Sua ta ipet pa kwom na, nio aŋre kembei koroŋ tio ŋonoono. Ilip pa pat silba mi gol munŋaana ka tieene.

⁷³Itum nomom ta imbuuzu yo mi iur yo. Tana uulu yo be aŋkam kat ŋgar pa tutu ku.

⁷⁴Zin wal ta timototo u mi tileŋleŋ la kalŋom na, sombe tire yo, na menmeen zin. Paso, aŋpase pa sua ku mbukŋana, mi aŋurur motoŋ pa ka ŋonoono be ipet.

⁷⁵O Yooba, nio aŋute: Tutu ku mi kadoono ta urur pizin tomtom, ina indeŋdeeŋe men. Mi nu toto sua ku mbukŋana mi urur lelem pio, tanata balis yo mi pazal yo.

⁷⁶Nio mbesooŋo ku tau. Tana aŋsuŋu be to sua ku mbukŋana, mi swe mbulu ku ta urur lelem pa wal ku mi muŋaiŋai zin na. Naso potor leleŋ mi pombol yo.

⁷⁷Lelem isaana pio, mi uulu yo ma aŋbot ambai mini. Pa sua ta nu kam piam, ta ikam yo ma leleŋ ndabok kat.

⁷⁸Zin wal ta tipakurkur zitun mi matan pasomu, nako kan miaŋ. Pa tiŋgalŋgal sorok sua pakaamŋana pio. Mi nio, nako motoŋ lala pa sua boozomen ta nu ur na, mi aŋkamam ŋgar pa.

⁷⁹Zin wal ta timototo u mi tileŋleŋ la kalŋom, mi tiute tutu ta nu ur pa wal ku na, zin ko timar mi tigaaba yo.

⁸⁰Nio leleŋ be ŋgar tio iŋgeeze men, mibe aŋto kat tutu ku ta tibeede pataaŋa kek na. Naso koŋ miaŋ pa ituŋ som.

⁸¹O Yooba, nio aŋzza u be uulu yo, mi aŋbel naamaŋom kek. Tana mburoŋ imap ma aŋsaana kat. Tamen aŋpase men pa sua ku.

⁸²Nio aŋurur motoŋ pa sua ku mbukŋana be iur ŋonoono. Mi aŋnaama, aŋnaama ma som. Ŋiizi na potor leleŋ ma ambai mini?

⁸³Nio aŋsaana ma tomtom matan mbeleele yo kek. Tamen tutu ku ta tibeede pataaŋa kek na, motoŋ mbeleele som.

⁸⁴Nio mbesooŋo ku tau. Parei ta nu gedgeede koŋ koi bizin mi tiseseeze motoŋ? Ŋiizi na ur kadoono pizin?

⁸⁵Re. Zin wal ta tipakurkur zitun mi matan pasomu na, tikel naala pio kek be aŋtop sula. Mi sua ta nu kam piam na, wal tana titoto som.

⁸⁶Tutu ku ta boozomen na, irao aŋdemeere mi aŋpase pa be iuulu yo. Mi iŋgi tomtom tiseseeze sorok motoŋ. Tana uulu yo lak!

⁸⁷Pa molo som to tipun yo ma aŋmeete ma aŋmap pa toono. Tamen aŋpizil ndemeŋ pa sua ta nu ur na som.

⁸⁸Nu toto sua ku mbukŋana mi urur lelem pa wal ku. Tana uulu yo ma aŋbot ambai mini. Naso motoŋ iŋgalŋgal zaala ta nu ur pa wal ku na, mi aŋtoto ka tutu. Tutu tana ipet pa itum kwom tau.

⁸⁹O Yooba, sua ku ko imbol mi imbotmbot ma alok. Irao imap na som. Pa uunu imbot ta saamba a.

⁹⁰Tomtom tipepeebe len kelŋan, mi iseeŋge iseeŋge ma ila. Mi mbulu ku ta zzo sua ŋonoono men mi toto sua ku na, ta kembena. Iseeŋge iseeŋge ma ila. Nu ta ur toono ma tuŋ kat, tana imbol ma imbotmbot.

⁹¹Pa sua ta nu ur, ta ikiskis koroŋ ta munŋaana men ma timbotmbot murin. Mi koroŋ ta boozomen timbotmbot be timbesmbeeze pu men.

⁹²Sombe leleŋ ilip pa sua ku som, so pataŋana tio ikam yo ma aŋmeete.

⁹³Sua boozomen ta nu ur na, irao motoŋ mbeleele na som. Som ma som kat. Pa sua ku, ta ikam yo ma aŋbot ambai.

⁹⁴Nio aŋwe lem kek. Tana kamke yo lak! Pa nio aŋkam kinkiini be aŋto sua boozomen ta nu ur na.

⁹⁵Iŋgi zin wal sananŋan tizaŋzaaŋa yo be tipun yo ma aŋmeete. Tamen nio aŋkamam ŋgar men pa tutu ta nu ur pa wal ku na.

⁹⁶Nio aŋre koroŋ sa ila ma iwe ambai komboono na som. Pa koroŋ ta boozomen tilala ma timilmiili. Tamen tutu ku na, ambai komboono, mi imbotmbot ma alok.

⁹⁷Sua ta nu kam piam na, nio leleŋ pa ilip! Tana zoŋ ise ma ila zoŋ isula na, motoŋ ilala pa mi aŋrru ka ŋgar.

⁹⁸Tutu ku imbotmbot raama yo totomen. Tabe ikam ma ŋgar tio ilip pa koŋ koi bizin ŋgar kizin.

⁹⁹Mi ŋgar tio ilip pa zin wal ŋgarŋan ta tipaute yo na tomini. Pa zaala ta nu ur pa wal ku na, motoŋ ilala pa ka tutu mi aŋkamam ŋgar pa.

¹⁰⁰Mi ŋgar tio ilip pa zin kolman ŋgar kizin tomini. Pa sua boozomen ta nu ur na, motoŋ iŋgalŋgal mi aŋtoto.

¹⁰¹Nio aŋgabiizi ituŋ, mi aŋbotmbot molo pa zaala sananŋan ta boozomen, bekena aŋto sua ku.

¹⁰²Tana aŋpizil ndemeŋ pa tutu ku ndeeŋeŋan som. Pa nu itum ta paute yo pa tutu tana.

¹⁰³Bigil suruunu inamut. Mi sua ku na, inamut kat. Ilip pa bigil suruunu.

¹⁰⁴Sua boozomen ta nu ur na, iuluulu yo be aŋkam ŋgar ambaiŋana. Tana aŋurur koi pa mbulu boozomen ta iyaryaaru yo be aŋpizil ndemeŋ pu.

¹⁰⁵Sua ku, ta iurur mat pio kembei ta kai i, mi izzo yo pa zaala tabe aŋto.

¹⁰⁶Nio aŋbuk sua pu, mi aŋpombol ma imbol kat, be aŋto tutu ku ndeeŋeŋan.

¹⁰⁷O Yooba, iŋgi pataŋana biibi kat indeeŋe yo. To sua ku mbukŋana, mi uulu yo ma aŋbot ambai mini.

¹⁰⁸Nio leleŋ be aŋpakuru mi sua tio iwe kembei patoronŋana ta nu lelem pa i. Paute yo pa tutu ku ndeeŋeŋan.

¹⁰⁹Gorgori nio aŋbotmbot naala kezeene. Tamen sua ta nu kam piam na, motoŋ mbeleele som.

¹¹⁰Zin wal sananŋan tiurur kilis be tikeene yo. Tamen sua boozomen ta nu ur na, aŋzem som.

¹¹¹Tutu ta nu ur pa wal ku, ina matamur ambaiŋana ta kam pio. Tana nio ko aŋkiskis ma alok. Pa ina, nio aŋre kembei koroŋ tio ŋonoono, mi ikam ma leleŋ ndabok kat.

¹¹²Tutu ku ta tibeede pataaŋa kek na, nio leleŋ iur be aŋtoto ma irao swoŋ imap.

¹¹³Zin wal ta tiur kat lelen pu som, mi titeege tete ru na, leleŋ pizin risa som. Mi sua ta nu kam piam na, leleŋ pa ilip.

¹¹⁴Nu we ur pio be aŋke lela, mi nu we siŋgiao pio mi poroukalkaala yo. Tana aŋpase pa sua ku mi aŋzza be iur ŋonoono.

¹¹⁵Tana niom wal ta kakamam mbulu sananŋana na, koko molo pio. Pa nio leleŋ be motoŋ iŋgalŋgal tutu ki Anutu tio mi aŋtoto.

¹¹⁶O Yooba, to sua ku mbukŋana mi we silou pio. Naso aŋmender mbolŋana mi aŋbot ambai. Kokena aŋur sorok motoŋ pu, to koŋ miaŋ.

¹¹⁷Palot yo, mi tatke yo pa pataŋana tio ti. Naso aŋbot ambai, mi motoŋ iŋgalŋgal tutu ku ta tibeede pataaŋa kek na.

¹¹⁸Wal boozomen ta so tipaŋoobo pa tutu ku ta tibeede pataaŋa kek na, nu pizil ndemem pizin. Pa mbulu kizin pakaamŋana iswe zin kembei tipizil ndemen pa zaala ku kek.

¹¹⁹Zin wal sananŋan ta timbotmbot toono na, nu re zin ta boozomen kembei musmuuzu sorok ta tiwirri ma ila lene. Tana zaala ta nu ur pa wal ku, ramaki ka tutu na, nio leleŋ pa ilip.

¹²⁰Nio aŋkam ŋgar pu na, kuliŋ imoto. Pa nu potomŋom mi mburom keskeezeŋom. Mi mbulu ku ta urur kadoono pizin tomtom, ina tomini ikam yo ma aŋmoto koŋ.

¹²¹Nio aŋkam ŋoobo tomtom sa som. Aŋkamam mbulu ndeeŋeŋana men. Tana zem yo la koŋ koi bizin naman pepe.

¹²²Nio mbesooŋo ku tau. Tana mender pio mi poroukaala yo ma aŋbot ambai. Kokena zin wal ta tipakurkur zitun mi matan pasomu na, tiseeze motoŋ mi tikoto yo.

¹²³Nio aŋurur motoŋ pu be kamke yo, mi aŋbel naamaŋom kek. Ŋiizi na kam mbulu ndeeŋeŋana ta mbuk sua pa na, mi uulu yo?

¹²⁴Nio mbesooŋo ku. Tana mbulu ku ta toto sua ku mbukŋana mi urur lelem pa wal ku na, swe pio ma aŋre tomini. Mi paute yo pa tutu ku ta tibeede pataaŋa kek na.

¹²⁵Nio mbesooŋo ku. Tana kam leŋ ŋgar ambaiŋana. Naso aŋkam kat ŋgar pa tutu ta ur pa wal ku na.