Psalm 35:19-27

¹⁹Yuwn yibenbawon nawu ngaye ngandiwidnan bu kabirrinjilngmak ngayekenh. Nakka ngandiwidnan bu djal mankarreburudjang. Bedda wanjh kabirriburlumerren bu ngaye ngandidjekmiwon.

²⁰Birrimekbe nawu birriwarre bininj wanjh minj kabirridjare kunmodmikenh. Bedda wanjh kabindimarnekurrehkurren bininj nawu kabirrihdjalni kamak rowk kore kurorre.

²¹Namekbe nawu birriwarre bininj ngandidarrkidjuhbun bu kabirriyime, “Yah! Kunukka wanjh ngudda yikurduyimeng! Ngad wanjh ngundinang kunmim ngadberre!”

²²Ngudda nawu Yawey! Ngudda yibenkurdunang rowk kore bedda ngandimarnekurduyimi. Dja yuwn kanbawon bu yidjaldi djarreh!

²³Ngudda God ngardduk! Ngudda wanjh kanmarnewohrnawohrnan! Wanjh kankidma, dja kanbidyikarrmen.

²⁴Yawey, ngudda nawu God ngardduk. Wanjh yibenbukka bininj nawu ngandidjuhbun bu ngaye ngaye ngamak bininj, bu djal mandjad ngakurduyime. Dja yuwn bu yibenbawon bu bedda ngandidjekmiwon.

²⁵Mak yuwn bu yibenbawon bedda kabirrimarneyimerren ngayekenh, “Bonj, wanjh karridarrkidmey nahni nawu karrihdjareni bu karrimarnekarrewarrehwarrewong!”

²⁶Bedda nawu kabirrinjilngmakmen ngayekenh bu ngandinan ngamankan, wanjh ngadjare yibenmarnbun bu kabirridjalbarabun dja kabirriyemekarren.

²⁷Dja bininj nawu ngaye ngandiburlume bu ngudda kanmakwan, wanjh bedda kabirridjalnjilngmaknin dja ngundidjalwayini ke bu kabirrikayhme munguyh munguyh, kabirriyime, “Karridjalburluburlumen nawu Yawey! Nungka wanjh kabirrokmiwe nuye bininj nawu kabimarnedurrkmirri!”