Ola Saam 35:19-27

¹⁹Nomo larram ol detlot laiyinwan enami blanga jidan gudbinji langa ol main trabul. Olabat heidimbat mi fo najing. Nomo larram olabat laflaf langa ol main trabul.

²⁰Olabat nomo tok gudbinjiwei, bat dei oldei meigimap olkainaba laiyawan stori blanga ola brabli gudwan pipul.

²¹Olabat bleim mi en jingat adbala lagijat, “Wibin luk wanim yubin dum.”

²²Bat yubin luk ebrijing bin hepin, YAWEI. Wal yu nomo jidan kwaitbala, main bos. Nomo jidan longwei.

²³Yu gidap main bos en deigim main pat na. Yu gidap main God en yu sori langa ol main trabul.

²⁴YAWEI, yu nomo garram eni rong. Yu jidan trubala. Wal yu sabi mi. Dalim ebribodi ai nomo bin dum eni rong. Nomo larram main enami olabat blanga tridim mi nogudwei.

²⁵Nomo larram olabat tok gija lagijat, “Gudjob! Im binij na! Wibin meigim im gowei na! Lagijat na wibin wandim!”

²⁶Yu bidim ol detlot pipul hu tridim mi nogudwei blanga main trabul. Meigim olabat jinggabat olkainabawei. Larram ol detlot pipul hu oldei reken miselp blanga ebrijing garra sheim miselp nomo lilbit en jidan nomo garram eni rispek.

²⁷Larram detlot pipul hu wandim mi blanga jidan friwan, blanga jingat gudbinjiwei lagijat, “Trubala! YAWEI im brabli haibala! Im gudbinji langa im wekinmen weya im garram ebrijing.” Lagijat na dei garra tok.