3El akkeye inse su musalla Ac pwelah kinet kaclos.
4El pakiya pisen itu uh Ac El sang inen kais sie selos.
5Leum lasr El fulat ac ku; Lalmwetmet lal tia ku in srikeyuki.
6El tulokunulosyak su pilesreyuk, Ac itungya mwet koluk nu infohk uh.
7Yuk on in kaksak nu sin LEUM GOD; Srital ke harp nu sin God lasr.
8El asroelik pukunyeng inkusrao; El supwama af nu faclu Ac El oru tuh mah in kap fin inging uh.
9El sang nu sin kosro ma nalos, Ac kite won raven fusr ke elos pang.
10LEUM GOD El tia insewowo ke horse ku, El tia pac engankin mwet mweun pulaik;
11Ac El insewowo selos su akfulatyal, Ac lulalfongi ke lungse kawil lal.
12Kaksakin LEUM GOD, O Jerusalem! Kaksakin God lom, O Zion!
13El akkeye mutunpot lom, Ac El akinsewowoye mwet lom.
14El taran masrol ke facl sum tuh in misla; El akkihpye kom ke wheat na wowo.
15El sang sie sap ku nu sin faclu, Ac ma El fahk uh sa in orekla.
16El oralik snow oana sie kaot, Ac El oralik aunfong oana kutkut.
17El supwama af yohk kosra oana fikar; Wangin mwet ku in muteng mihsrisr kac.
18Na El sang sap ku lal, ac ice uh kofelik; El supwama eng, ac kof uh asrla.
19El fahkak kas lal nu sin mwet lal — Mwe luti lal ac ma sap lal nu sin Israel.
Psalm 147
Psalm 147:3-19