Psalm 145:2-20

²Nga fah sot kulo nu sum len nukewa; Nga fah kaksakin kom nu tok ma pahtpat.

³LEUM GOD El fulat, ac fal in arulana kaksakinyuk; Fulat lal arulana yohk liki ma kut ku in kalem kac.

⁴Orekma lom ac fah kaksakinyuk sin fwil nu ke fwil; Elos ac fah fahkak orekma ku lom.

⁵Elos ac fah srumun ke wolana ac wal lom, Ac nga fah nunku yohk ke orekma wolana lom.

⁶Mwet uh ac fah srumun ke orekma ku lom; Ac nga fah fahkak ke fulat lom.

⁷Elos ac fah sulkakin yokiyen wo lom, Ac onkakin kulang lom.

⁸LEUM GOD El kulang ac pakoten, El paht in mulat ac el sesseslana ke lungkulang.

⁹El wo nu sin mwet nukewa Ac pakoten lal oan fin ma nukewa El orala.

¹⁰O LEUM GOD, ma orekla lom nukewa fah kaksakin kom, Ac mwet lom nukewa fah sot kulo nu sum.

¹¹Elos fah kaskaskin wolana ke ku lun tokosrai lom, Ac fahkak ku lom,

¹²Tuh mwet nukewa fah etu ke orekma ku lom Ac ke wolana ac fulat lun tokosrai lom.

¹³Tokosrai lom oan ma pahtpat, Ac kom tokosra nwe tok. LEUM GOD El oaru nu ke wuleang lal; El pakoten in ma nukewa El oru.

¹⁴El kasrelos nukewa su muta in ongoiya; Ac El tulokunulosyak nukewa su munasla.

¹⁵Ma moul nukewa nget nu sum in finsrak lalos, Ac kom sang nu selos mwe mongo in pacl elos enenu.

¹⁶Kom sang fal nu selos Ac kom akfalye enenu lun ma nukewa su moul.

¹⁷LEUM GOD El suwoswos in ma nukewa El oru, Ac kulang in orekma lal nukewa.

¹⁸El apkuran nu selos nukewa su pang nu sel, Su pang nu sel ke inse pwaye.

¹⁹El akfalye enenu lalos nukewa su akfulatyal; El lohng pusren tung lalos ac molelosla.

²⁰El karinganulos nukewa su lungse El, Ac El ac fah kunausla mwet koluk.