Psalm 119:75-128

⁷⁵LEUM GOD, nga etu tuh nununku lom suwohs, Ac kom kaiyu mweyen kom inse pwaye.

⁷⁶Lela lungse kawil lom in akwoyeyu, Oana kom tuh wulela nu sik, mwet kulansap lom.

⁷⁷Pakomutuk, ac nga fah moul, Tuh nga insewowo ke ma sap lom.

⁷⁸Lela mwet filang in mwekin lah elos akkolukyeyu ke kikiap; A funu nga, nga fah arulana nunku ke kas in luti lom.

⁷⁹Lela tuh elos su akfulatye kom in tuku nu yuruk — Elos nukewa su etu ke ma sap lom.

⁸⁰Lela nga in akos na pwaye ma sap lom Tuh nga fah tia akmwekinyeyuk.

⁸¹LEUM GOD, nga totola in soano molela lom nu sik; Nga filiya lulalfongi luk ke kas lom.

⁸²Mutuk totola in tupan ma kom tuh wulela kac, Ac nga fahk, “Kom ac kasreyu ngac?”

⁸³Nga oana sie pak in neinyuk wain ma sisila ac wanginla sripa, Tusruktu nga tiana mulkunla ma sap lom.

⁸⁴Nga ac soano putaka? Kom ac kai mwet su akkeokyeyu ngac?

⁸⁵Mwet filang su tia akos ma sap lom, Elos pukanak luf in sruokyuwi.

⁸⁶Ma sap lom nukewa fal in lulalfongiyuk; Mwet elos akkeokyeyu ke kas kikiap — kasreyu!

⁸⁷Elos apkuranna in uniyuwi, Tusruk nga tiana pilesrala ma sap lom.

⁸⁸Ke lungse kawil lom, oru wo nu sik, Tuh nga fah akos ma sap lom.

⁸⁹Kas lom, O LEUM GOD, oan ma pahtpat, Aok, oan ma pahtpat inkusrao.

⁹⁰Oaru lom oanna ke fwil nukewa; Kom tuh oakiya faclu, ac faclu srakna oan.

⁹¹Ma nukewa oanna nwe misenge ke sripen sap lom, Ac ma nukewa kulansapwekom.

⁹²Ma sap lom funu tia ase insewowo nu sik, Nga lukun misa tari ke mwe keok nu sik.

⁹³Nga fah tiana pilesru kas in luti lom; Tuh ke ma inge kom moliyula.

⁹⁴Nga ma lom — moliyula! Nga srike na in akos ma sap lom.

⁹⁵Mwet koluk elos soano in uniyuwi, Tusruktu nga fah arulana nunku ke ma sap lom.

⁹⁶Nga etu tari lah oasr saflaiyen ma nukewa; Tusruktu ma sap lom wangin saflaiya.

⁹⁷Arulana yohk lungse luk ke ma sap lom! Nga nunku kac ke len nufon.

⁹⁸Ma sap lom wiyu pacl e nukewa Ac oru nga lalmwetmet liki mwet lokoalok luk.

⁹⁹Nga kalem kac yohk liki mwet luti luk nukewa, Mweyen nga arulana nunku ke kas in luti lom.

¹⁰⁰Yohk lalmwetmet luk liki mwet matu, Mweyen nga akos ma sap lom.

¹⁰¹Nga taranyu liki orekma koluk nukewa, Mweyen nga lungse akos kas lom.

¹⁰²Nga tiana pilesrala kas in luti lom, Mweyen kom na pa lutiyu.

¹⁰³Kas in luti lom arulana emwem, Aok, emwem liki na honey nu ke oalik!

¹⁰⁴Nga eis lalmwetmet ke ma sap lom, Ke ma inge nga srunga inkanek koluk nukewa.

¹⁰⁵Kas lom lam nu ke niuk Ac kalem nu ke inkanek luk.

¹⁰⁶Nga orala sie wulela na ku Tuh nga in akos kas in luti suwoswos lom.

¹⁰⁷LEUM GOD, pwayena lah mwe keok luk arulana upa; Sruokya moul luk, oana ke kom wulela.

¹⁰⁸Eis pre in sang kulo luk, O LEUM GOD, Ac lutiyu ke ma sap lom.

¹⁰⁹Nga akola pacl nukewa in pilesrala moul luk, Tuh nga tiana mulkunla ma sap lom.

¹¹⁰Mwet koluk elos filiya mwe kwasrip nu sik, Tuh nga tiana pilesrala ma sap lom.

¹¹¹Ma sap lom mwe usru luk nwe tok, Aok, mwe engan lun insiuk.

¹¹²Nga sulela tari tuh nga in akos ma sap lom Nwe ke na nga misa.

¹¹³Nga srungalos su tia inse pwaye nu sum, A nga lungse ma sap lom.

¹¹⁴Kom nien wikla luk ac lango luk; Nga filiya finsrak luk in wuleang lom.

¹¹⁵Mwet koluk, kowos fahla likiyu. Nga ac fah akos ma sap lun God luk.

¹¹⁶Akkeyeyu, oana kom wulela, ac nga fah moul; Nikmet lela tuh nga in toasrla ke sripen tia sun mwe finsrak luk!

¹¹⁷Sruokyuwi tuh nga fah tu na ku, Ac nga fah lohang nu ke ma sap lom pacl e nukewa.

¹¹⁸Kom ngetla liki mwet nukewa su seakos ma sap lom; Pwapa kutasrik lalos wangin sripa.

¹¹⁹Kom oru mwet koluk nukewa oana kutkut, Ke ma inge nga lungse kas in luti lom.

¹²⁰Ke sripom nga sangeng; Nga arulana sangeng ke sripen nununku lom.

¹²¹Nga oru ma suwohs ac pwaye; Nikmet filiyula nu inpoun mwet lokoalok luk.

¹²²Wulela nu sik lah kom ac kasru mwet kulansap lom; Nikmet lela mwet inse fulat in akkeokyeyu.

¹²³Mutuk totola in soano molela lom nu sik Su kom tuh wulela kac.

¹²⁴Oru nu sik fal nu ke lungse kawil lom, Ac luti nu sik sap ku lom.

¹²⁵Nga mwet kulansap lom; ase etauk nu sik Tuh nga fah etu kas in luti lom.

¹²⁶LEUM GOD, pacl fal kom in kai mwet uh, Mweyen elos seakos ma sap lom.

¹²⁷Nga lungse ma sap lom yohk liki gold, Yohk liki gold ma arulana nasnas.

¹²⁸Ke ma inge nga fahsr ke inkanek in luti lom nukewa; Ac nga srunga inkanek sutuu nukewa.