Psalm 119:38-176

³⁸Nga mwet kulansap lom, akfalye wulela lom nu sik, In oana wulela su kom oru nu selos su akos kom.

³⁹Moliyula liki kaskas kou su nga sangeng kac; Fuka woiyen nununku lom!

⁴⁰Nga kena akos ma sap lom; Ase moul sasu nu sik, tuh kom suwoswos.

⁴¹LEUM GOD, akkalemye lupan lungse lom nu sik, Ac moliyula oana kom wulela kac.

⁴²Na nga fah ku in topkolos su kaskas kou keik, Mweyen nga lulalfongi ke kas lom.

⁴³Oru tuh nga in ku in kaskas pwaye pacl e nukewa, Tuh finsrak luk oan in nununku lom.

⁴⁴Nga ac fah liyaung ma sap lom pacl e nukewa, Nu tok ma pahtpat.

⁴⁵Nga fah muta in sukosok pwaye, Mweyen nga srike in akos kas in luti lom.

⁴⁶Nga fah fahkak nu sin tokosra uh ma kom sapkin, Ac nga fah tia akmwekinyeyuk.

⁴⁷Nga pulakin insewowo ke nga akos ma sap lom, Mweyen nga arulana lungse kas lom.

⁴⁸Nga sunakin ac lungse ma sap lom, Ac nga fah nunku yohk ke mwe luti lom.

⁴⁹Esam wulela lom nu sik, mwet kulansap lom, Tuh ma inge ase finsrak nu sik.

⁵⁰Finne in pacl in keok luk, nga akwoyeyuk Mweyen wulela lom ase moul nu sik.

⁵¹Mwet filang elos aksruksrukiyu pacl nukewa, Tusruktu nga tiana fahsr liki ma sap lom.

⁵²Nga esam nununku lom in pacl oemeet, Ac ma inge akwoyeyu, O LEUM GOD.

⁵³Ke nga liye mwet koluk ke elos lain ma sap lom, Nga arulana kasrkusrak.

⁵⁴In pacl fototo luk fin faclu Nga kinala on ke sap lom.

⁵⁵Ke fong uh nga esam kom, O LEUM GOD, Ac nga nunku ke ma sap lom.

⁵⁶Nga pulakin insewowo Ke nga akos ma sap lom.

⁵⁷O LEUM GOD, kom na pa nga enenu, Ac nga wulela tuh nga fah akos ma sap lom.

⁵⁸Nga siyuk sum ke insiuk nufon Tuh kom in pakomutuk, in oana wulela lom.

⁵⁹Ke nga nunku ke ouiyen moul luk, Nga wulela nga in sifil forla ac fahsr tukun mwe luti lom.

⁶⁰Nga sulaklak, ac tia tuptupan In akos ma kom sapkin.

⁶¹Mwet koluk elos filiya mwe kwasrip nu sik, Tusruktu nga tiana mulkunla ma sap lom.

⁶²Ke infulwen fong nga tukakek Ac kaksakin kom ke nununku suwoswos lom.

⁶³Nga mwet kawuk lun mwet nukewa su kulansupwekom, Aok, elos nukewa su akos ma sap lom.

⁶⁴LEUM GOD, faclu sessesla ke lungkulang lom; Lutiyu ke ma sap lom.

⁶⁵LEUM GOD, kom oru wo nu sik, mwet kulansap lom, Fal nu ke wulela lom.

⁶⁶Ase etauk ac lalmwetmet nu sik, Tuh nga lulalfongi ke sap lom.

⁶⁷Meet liki kom tuh kaiyu, nga fahsr sayen ma sap lom, A inge nga akos kas lom.

⁶⁸Kom arulana wo ac arulana kulang! Lutiyu ke sap lom.

⁶⁹Mwet filang elos tuh fahk kas kikiap keik, Tusruktu nga akos mwe luti lom ke insiuk nufon.

⁷⁰Wanginna kalem lun mwet inge, A funu nga, nga insewowo ke ma sap lom.

⁷¹Kaiyuk lom nu sik mwe akwoyeyu, Mweyen ke sripa sac nga lutlut ke ma sap lom.

⁷²Ma sap su kom ase nu sik, yohk kalmac nu sik Liki mani nukewa fin faclu.

⁷³Kom oreyula ac karinginyu; Ase etauk nu sik tuh nga fah luti ma sap lom.

⁷⁴Elos su akfulatye kom elos ac engan ke elos liyeyu, Mweyen nga lulalfongi ke wulela lom.

⁷⁵LEUM GOD, nga etu tuh nununku lom suwohs, Ac kom kaiyu mweyen kom inse pwaye.

⁷⁶Lela lungse kawil lom in akwoyeyu, Oana kom tuh wulela nu sik, mwet kulansap lom.

⁷⁷Pakomutuk, ac nga fah moul, Tuh nga insewowo ke ma sap lom.

⁷⁸Lela mwet filang in mwekin lah elos akkolukyeyu ke kikiap; A funu nga, nga fah arulana nunku ke kas in luti lom.

⁷⁹Lela tuh elos su akfulatye kom in tuku nu yuruk — Elos nukewa su etu ke ma sap lom.

⁸⁰Lela nga in akos na pwaye ma sap lom Tuh nga fah tia akmwekinyeyuk.

⁸¹LEUM GOD, nga totola in soano molela lom nu sik; Nga filiya lulalfongi luk ke kas lom.

⁸²Mutuk totola in tupan ma kom tuh wulela kac, Ac nga fahk, “Kom ac kasreyu ngac?”

⁸³Nga oana sie pak in neinyuk wain ma sisila ac wanginla sripa, Tusruktu nga tiana mulkunla ma sap lom.

⁸⁴Nga ac soano putaka? Kom ac kai mwet su akkeokyeyu ngac?

⁸⁵Mwet filang su tia akos ma sap lom, Elos pukanak luf in sruokyuwi.

⁸⁶Ma sap lom nukewa fal in lulalfongiyuk; Mwet elos akkeokyeyu ke kas kikiap — kasreyu!

⁸⁷Elos apkuranna in uniyuwi, Tusruk nga tiana pilesrala ma sap lom.

⁸⁸Ke lungse kawil lom, oru wo nu sik, Tuh nga fah akos ma sap lom.

⁸⁹Kas lom, O LEUM GOD, oan ma pahtpat, Aok, oan ma pahtpat inkusrao.

⁹⁰Oaru lom oanna ke fwil nukewa; Kom tuh oakiya faclu, ac faclu srakna oan.

⁹¹Ma nukewa oanna nwe misenge ke sripen sap lom, Ac ma nukewa kulansapwekom.

⁹²Ma sap lom funu tia ase insewowo nu sik, Nga lukun misa tari ke mwe keok nu sik.

⁹³Nga fah tiana pilesru kas in luti lom; Tuh ke ma inge kom moliyula.

⁹⁴Nga ma lom — moliyula! Nga srike na in akos ma sap lom.

⁹⁵Mwet koluk elos soano in uniyuwi, Tusruktu nga fah arulana nunku ke ma sap lom.

⁹⁶Nga etu tari lah oasr saflaiyen ma nukewa; Tusruktu ma sap lom wangin saflaiya.

⁹⁷Arulana yohk lungse luk ke ma sap lom! Nga nunku kac ke len nufon.

⁹⁸Ma sap lom wiyu pacl e nukewa Ac oru nga lalmwetmet liki mwet lokoalok luk.

⁹⁹Nga kalem kac yohk liki mwet luti luk nukewa, Mweyen nga arulana nunku ke kas in luti lom.

¹⁰⁰Yohk lalmwetmet luk liki mwet matu, Mweyen nga akos ma sap lom.

¹⁰¹Nga taranyu liki orekma koluk nukewa, Mweyen nga lungse akos kas lom.

¹⁰²Nga tiana pilesrala kas in luti lom, Mweyen kom na pa lutiyu.

¹⁰³Kas in luti lom arulana emwem, Aok, emwem liki na honey nu ke oalik!

¹⁰⁴Nga eis lalmwetmet ke ma sap lom, Ke ma inge nga srunga inkanek koluk nukewa.

¹⁰⁵Kas lom lam nu ke niuk Ac kalem nu ke inkanek luk.

¹⁰⁶Nga orala sie wulela na ku Tuh nga in akos kas in luti suwoswos lom.

¹⁰⁷LEUM GOD, pwayena lah mwe keok luk arulana upa; Sruokya moul luk, oana ke kom wulela.

¹⁰⁸Eis pre in sang kulo luk, O LEUM GOD, Ac lutiyu ke ma sap lom.

¹⁰⁹Nga akola pacl nukewa in pilesrala moul luk, Tuh nga tiana mulkunla ma sap lom.

¹¹⁰Mwet koluk elos filiya mwe kwasrip nu sik, Tuh nga tiana pilesrala ma sap lom.

¹¹¹Ma sap lom mwe usru luk nwe tok, Aok, mwe engan lun insiuk.

¹¹²Nga sulela tari tuh nga in akos ma sap lom Nwe ke na nga misa.

¹¹³Nga srungalos su tia inse pwaye nu sum, A nga lungse ma sap lom.

¹¹⁴Kom nien wikla luk ac lango luk; Nga filiya finsrak luk in wuleang lom.

¹¹⁵Mwet koluk, kowos fahla likiyu. Nga ac fah akos ma sap lun God luk.

¹¹⁶Akkeyeyu, oana kom wulela, ac nga fah moul; Nikmet lela tuh nga in toasrla ke sripen tia sun mwe finsrak luk!

¹¹⁷Sruokyuwi tuh nga fah tu na ku, Ac nga fah lohang nu ke ma sap lom pacl e nukewa.

¹¹⁸Kom ngetla liki mwet nukewa su seakos ma sap lom; Pwapa kutasrik lalos wangin sripa.

¹¹⁹Kom oru mwet koluk nukewa oana kutkut, Ke ma inge nga lungse kas in luti lom.

¹²⁰Ke sripom nga sangeng; Nga arulana sangeng ke sripen nununku lom.

¹²¹Nga oru ma suwohs ac pwaye; Nikmet filiyula nu inpoun mwet lokoalok luk.

¹²²Wulela nu sik lah kom ac kasru mwet kulansap lom; Nikmet lela mwet inse fulat in akkeokyeyu.

¹²³Mutuk totola in soano molela lom nu sik Su kom tuh wulela kac.

¹²⁴Oru nu sik fal nu ke lungse kawil lom, Ac luti nu sik sap ku lom.

¹²⁵Nga mwet kulansap lom; ase etauk nu sik Tuh nga fah etu kas in luti lom.

¹²⁶LEUM GOD, pacl fal kom in kai mwet uh, Mweyen elos seakos ma sap lom.

¹²⁷Nga lungse ma sap lom yohk liki gold, Yohk liki gold ma arulana nasnas.

¹²⁸Ke ma inge nga fahsr ke inkanek in luti lom nukewa; Ac nga srunga inkanek sutuu nukewa.

¹²⁹Kas in luti lom wolana; Nga akos ke insiuk nufon.

¹³⁰Aketeyen mwe luti lom ase kalem, Ac sang etauk nu sin mwet nikin.

¹³¹In kena luk nu ke sap ku lom Nga mangelik na ke malak luk.

¹³²Forma nu sik ac pakomutuk, Oana kom oru nu selos nukewa su lungse kom.

¹³³Sruokyuwi nga in tia ikori, fal nu ke wulela lom, Ac tia lela tuh ma koluk in kutangyula.

¹³⁴Moliyula liki mwet su akkeokyeyu, Tuh nga fah akos sap lom.

¹³⁵Kom in akinsewowoyeyu ke kalem lun motom, Ac lutiyu ke oakwuk lom.

¹³⁶Sroninmutuk sororla oana soko infacl Mweyen mwet uh elos tia akos ma sap lom.

¹³⁷LEUM GOD, kom suwoswos, Ac ma sap lom suwosna.

¹³⁸Oakwuk ma kom ase tari Arulana fal ac suwohs.

¹³⁹Kasrkusrak luk tayak in nga oana sie e, Mweyen mwet lokoalok luk elos tia akilen ma sap lom.

¹⁴⁰Wulela lom pwayena! Nga arulana lungse!

¹⁴¹Nga mwet lusrongten, ac kwaseyuk nga, Tusruktu nga tia pilesru kas in luti lom.

¹⁴²Suwoswos lom ac fah oan ma pahtpat, Ac ma sap lom pwaye pacl e nukewa.

¹⁴³Nga arulana keok ac fosrnga, Tusruktu ma sap lom akinsewowoyeyu.

¹⁴⁴Kas in luti lom suwosna in pacl e nukewa; Ase nu sik etauk ac nga fah moul.

¹⁴⁵Nga pang nu sum ke insiuk nufon. Topukyu, O LEUM GOD, ac nga fah akos ma sap lom.

¹⁴⁶Nga pang nu sum, Moliyula, ac nga fah liyaung ma sap lom.

¹⁴⁷Meet liki lenelik nga pang nu sum in kasreyu; Nga filiya finsrak luk in wulela lom.

¹⁴⁸In fong nufon se nga oanna ngetnget, Ac nunku yohk ke kas in luti lom.

¹⁴⁹Lohngyu, O LEUM GOD, ke sripen lungse lom kawil; Pakomutuk ac moliyula.

¹⁵⁰Mwet su akkeokyeyu elos apkuranme, Aok, elos su tiana karinganang ma sap lom.

¹⁵¹Tusruk kom apkuran nu yuruk, LEUM GOD, Ac ma sap lom nukewa oanna nwe tok.

¹⁵²In pacl loeloes somla nga lutlut ke mwe luti lom, Tuh kom oakiya in oan ma pahtpat.

¹⁵³Liye keok luk, ac moliyula, Mweyen nga tiana pilesru ma sap lom.

¹⁵⁴Loangeyu ac aksukosokyeyu; Moliyula, oana kom tuh wulela.

¹⁵⁵Mwet koluk ac fah tia moliyukla, Mweyen elos tia akos ma sap lom.

¹⁵⁶A pakoten lom yoklana, LEUM GOD. Akkalemye pakoten lom ac moliyula.

¹⁵⁷Pus mwet lokoalok luk ac mwet kalyeiyu, Tusruktu nga tiana mulkunla in akos ma sap lom.

¹⁵⁸Ke nga liye mwet kutasrik inge, nga arulana toasr selos, Mweyen elos tia liyaung sap lom.

¹⁵⁹LEUM GOD, liye lupan lungse luk nu ke kas in luti lom. Lungse lom uh tiana ekyek, ke ma inge moliyula!

¹⁶⁰Kas nukewa in ma sap lom arulana pwaye, Ac nununku suwoswos nukewa lom oan ma pahtpat.

¹⁶¹Mwet leum elos kalyeiyu ke wangin mwetik, Tusruktu nga akfulatye ma sap lom.

¹⁶²Nga arulana engan ke wuleang lom Oana sie mwet su konauk mwe kasrup yohk lal.

¹⁶³Nga srunga ac kwase ma kikiap nukewa, A nga lungse ma sap lom.

¹⁶⁴Pacl itkosr in len se nga fahkak kulo luk nu sum, Ke sripen nununku suwohs lom.

¹⁶⁵Elos su lungse ma sap lom elos muta in misla wo, Ac wangin kutena ma ac fah aktukulkulyelos.

¹⁶⁶LEUM GOD, nga soano kom in moliyula, Ac nga oru ma kom sapkin.

¹⁶⁷Nga akos kas in luti lom, Ac lungse ma inge ke insiuk nufon.

¹⁶⁸Nga akos ma sap lom ac mwe luti lom; Kom liye ma nukewa nga oru.

¹⁶⁹Lela pusren pang luk nu sum in sun kom, LEUM GOD! Ase etauk nu sik, oana kom tuh wulela.

¹⁷⁰Porongo pre luk, Ac moliyula, fal nu ke wulela lom!

¹⁷¹Nga fah kaksakin kom pacl e nukewa, Mweyen kom lutiyu ke ma sap lom.

¹⁷²Nga fah onkakin ma sap lom, Mweyen ma sap lom suwohs.

¹⁷³Akola pacl nukewa in kasreyu, Tuh nga sulela in fahsr tukun ma sap lom.

¹⁷⁴O LEUM GOD, nga kena eis kasru sum in moliyula. Nga konauk engan in ma sap lom.

¹⁷⁵Lela nga in moul, tuh nga fah ku in kaksakin kom; Lela tuh mwe luti lom in kasreyu.

¹⁷⁶Nga nikinyula in fufahsryesr luk oana soko sheep tuhlac; Ke ma inge fahsru ac sukyu, mwet kulansap lom, Mweyen nga tiana pilesru ma sap lom.