Prabebs 8:19-36

¹⁹Wanim yu gajim brom mi, im mobedawan langa det brabli gudwan gol, en im mobedawan langa det brabli gudwan silba.

²⁰Mi oldei wok langa det raitwei. Mi bulurrum det gudwan roud weya gibit ebribodi feyago,

²¹en mi oldei gibit main enijing langa detlot pipul hu laigim mi, en mi oldei bilimap olabat haus garram ola gudbala ting.

²²“Wal mi na bin jidan garram YAWEI wen imbin stat meigimbat dijan wel. Aibin iya longtaim bifo imbin meigim ebrijing.

²³Aibin jidan brom longtaim, bifo dijan wel bin jidan iya.

²⁴Aibin jidan bifo imbin meigim det solwoda, en wen nomo eni springwoda bin jidan.

²⁵Aibin bon bifo imbin meigim detlot bigwan en lilwan hil.

²⁶Aibin jidan bifo imbin meigim dijan wel en fam en dijan graun.

²⁷Aibin deya wen imbin pudum det skai deya langa top, en wen imbin pudum det mak weya det skai en kantri en solwoda jidan.

²⁸Aibin deya wen imbin meigim detlot klaud langa top, en wen imbin meigim det solwoda kamat.

²⁹Aibin deya wen imbin dalim det solwoda nomo blanga pasim det mak, en aibin deya wen imbin meigim det draiwan graun.

³⁰Aibin deya wansaid langa im, jis laik det men weya oldei meigim det plen hau blanga bildimap haus. Aibin oldei meigim im gudbinji ebridei, en aibin brabli gudbinji blanga jidanbat garram im.

³¹Aibin jidan brabli hepiwan langa dijan wel, en aibin brabli gudbinji garram ola pipul.

³²“Orait ol yumob yangmen, yumob garra lisin langa mi na. Yumob dum wanim mi dalimbat yumob blanga dum, wulijim yumob garra jidan hepiwan.

³³Yumob garra teiknodis wanim yumob bin len. Yumob garra len hau blanga jidan gudwei, en nomo gibit bekboun langa detlot wed.

³⁴Det men hu oldei jandap en weidabat blanga mi langa main dowa en lisin langa mi, im na garra jidan brabli hepiwan.

³⁵Det men hu faindim mi, garra jidan garram gudwan laif, en YAWEI garra gudbinji garram im.

³⁶Det men hu nomo laigim mi garra abumbat loda pein. Enibodi hu nomo laigim mi garra dai.” Lagijat na det brabli sabibalawan bin tok.