Pisalem 41:7-12

⁷Digau ala e hagadugina e ginaadou au le e leelee hagamoolee i nadau mehanga i di au. Digaula e hagamamaanadu nadau mee huaidu i di au.

⁸Digaula e helekai boloo, “Mee guu magi pale huoloo. Mee e deemee di hana gi daha mo dono moenge labelaa.”

⁹Dogu ihoo hagaaloho dela gu hagadagadagagee huoloo ginai au, gei e miami gimaua ngaadahi, guu huli e hai baahi labelaa mai gi di au.

¹⁰Meenei Dimaadua, Goe dumaalia mai gi di au, hagamaaloo ina aga au, gei au gaa tala di hui gi ogu hagadaumee.

¹¹Digaula ga hagalee maaloo i di au, gei au ga iloo bolo Goe e manawa tenetene mai gi di au.

¹²Goe ga hagamaamaa au, idimaa au dela e hai nia mee ala e donu, gei Goe ga benebene au i doo baahi gaa hana hua beelaa.