Pisalem 39:5-12

⁵“Goe ne hai dogu mouli bolo gi bodobodo behee? Di waalooloo o dogu mouli le e hai be di balumee i mua o hadumada. Ma e donu hua bolo di mouli o tangada le e hai gadoo be di oloolo madangi,

⁶be e hai be di malu. Madau mee huogodoo ala e hai le e maa gi daha. Gimaadou e benebene madau maluagina ge de iloo be ma koai dela ga hai mee gi nia maa.

⁷“Malaa, e hai behee? Ma koai dela ga hagadagadagagee ginai au, meenei di Tagi? Ma dela hua Kooe dela e hagadagadagagee ginai au.

⁸Haga dagaloaha ina au gi daha mo ogu huaidu huogodoo. Hudee heia digau dadaulia gi haganneennee ina au.

⁹Au gaa noho deemuu, hagalee hai dagu helekai, idimaa, ma Kooe dela ne hai au gi duadua beenei.

¹⁰Hudee daaligidia au labelaa! Au gu hoohoo bolo gaa made, ne hagamaawa Kooe.

¹¹Goe e daaligi madau huaidu gi doo wou. E hai gadoo be di hingodo, Goe e oho nia mee ala e aloho ai gimaadou. Ma e donu hua bolo gimaadou le e hai be di oloolo madangi!

¹²“Hagalongo mai gi dagu dalodalo, meenei Dimaadua, hagalongo gi dagu gahigahi. Hagamaamaa ina au i dogu madagoaa ma ga dangidangi. Idimaa, au la tangada hua mai i daha gadoo be ogu maadua mmaadua ala i mua, e noho hua hagabodobodo i mua o hadumada.