Pisalem 148:5-14

⁵Nia maa huogodoo gi hagaamuina di ingoo o Dimaadua! Idimaa, Mee ne helekai hua, gei nia maa guu hai.

⁶Mee ne helekai hua, gei nia mee guu noho gi nadau lohongo, gaa hana hua beelaa, gei nia maa e deemee di de hagalongo.

⁷Goodou hagaamuina Dimaadua mai i henuailala, goodou ala go nia manu hagamadagudagu dangada ala i lodo di moana mo ala i tua di moana,

⁸mo goodou ala go di ila mo di uwa hadu magalillili, nia ‘snow’ mo nia gololangi, mo nia madangi llauehe ala e hagalongo gi ana helekai.

⁹Goodou hagaamuina a Mee, goodou ala go nia gowaa nnoonua mo nia gonduu, nia laagau ala e huwa mo nia laagau o lodo henua,

¹⁰mo nia manu huogodoo, nia manu gaidala mono manu lodo geinga, nia manu dolodolo mono manu mamaangi.

¹¹Goodou hagaamuina a Mee, goodou ala go nia king mo digau huogodoo, nia dagi aamua mo digau huogodoo aamua ala i golo,

¹²mo goodou ala go nia dama daane mo nia dama ahina, digau mmaadua mo nia dama lligi.

¹³Digaula huogodoo gi hagaamuina di ingoo o Dimaadua! Dono ingoo la koia e aamua huoloo i nia ingoo huogodoo ala i golo. Dono madamada e noho i hongo di langi mo henuailala.

¹⁴Mee dela gu hagamaaloo aga dono henua, gei ana daangada huogodoo ga hagaamu a Mee, aalaa go digau Israel ala e aloho huoloo iei Mee. Goodou gi hagaamuina Dimaadua!