Pilipai 4:4-23

⁴Mot in ser gas una kum bung rop, uni mot tagun a Labino. Ma an watung meleti lena, mot in gasgas.

⁵Mot in ese puaso anumot a wowowon na petutna torom a taro rop. Milau mukut a Labino in nanpat.

⁶Gong mot nuknuk doko sur tu utna. Una kum utna rop, mot in wararing nama niaring na watung wakak torom o God. Ma mot in inanosi una numot a kum nemnem.

⁷Ra a malmal anun o God ra i labo sakit taun a mananos rop anun a taro, in tamtamabat a balamot ma a nuknuki mot, uni mot tagun o Karisito Iesu.

⁸A kum tistising, a ururop na wasiso ri a tumusi torom mot: A nuknuki mot in kis una kum utna ri: asau ra i lingmulus, asau ra di urur uni, asau ra i tokodos, asau ra katu dur uni, asau ra i tamtama wakak ma asau ra a taro det watungi lena i wakak. Ra tu utna in wakak sakit, o ra tu utna di watung ulabo pasi, a nuknuki mot in kis uni.

⁹Asau ra mot sa ususer pasi tagun iau, o mot sa rakon pasi, o mot sa longoro tari tagun iau, o mot sa tama tari un iau, mot in muri. Ra o God a tene malmal in kis tomo nam mot.

¹⁰A gas doko una Labino, uni uniri, mot sa nuk melet iau. I sa suano i ra ka mot warut iau, ikut, a lingmulus, ka mot dumano iau, ikut katu kisapi sur mot in warut iau.

¹¹Ka watungi lenri, uni a sibo, awu. Uni a sa ulason pas iau, sur an gas una kum sau ra an etoromi.

¹²A sa tasman a kinkinis na sibo, ma a sa tasmani utkai a kinkinis nama susut na utna. A sa lason sur an gasgas una a kum ngas na kinkinis ra an etoromi: ra an masur, o an murak, ra a utna in susut tang, o an sibo.

¹³A pet lar pas a kum utna rop kibino un o Karisito ra i udekdek iau.

¹⁴Ikut i wakak ra mot tur tomo nam iau una kum mamaut ra a taramo i.

¹⁵Mot a taro Pilipai, mot tasmani lena, ra a turpas a warawai nama Wakak na Wasiso tiro una papor Masedonia, ra numur a wan tagitiro o Masedonia, kalako taro na lotu det tur tomo nam iau sur det in warut iau nam tu etabor, awu, mot sot kut.

¹⁶Ra a kis tong o Tesalonaika, awu sur mot tabor iau ara dino kut, a susut na dino ut mot tabor iau ra a sibo.

¹⁷Awu sur anumot a etabor ra a ling suri. A nemi kut sur mot in los a ikul kura numur una numot a wakak na pinapam ra.

¹⁸A sa los pas a kum utna rop ra mot tula i. I labo sakit, ma i labo taun anung a sibo. Ka sibo mo sur tu utna, uni a kum utna ra mot tula i, a sa los pasi tan o Epaproditus. I elar nama etabor torom o God, ra i sangnain wakak, ra o God i gas nami, ma i tokodos toromi.

¹⁹A God anungi in pam sot a kum utna rop ra mot sibo suri, tagun anun a kum wakak na ululeng ra anundati, kibino un o Karisito Iesu.

²⁰Dat in ulabo pas anundat a God a Tamandat, ken rop ma ken rop. Amen.

²¹Mot in pitar anung a marmaris torom a taro rop anun o Karisito Iesu. A kum tistising una nurnur ra det kis tomo nam iau, det pitar anundet a marmaris torom mot.

²²A taro anun o God, det rop, det pitar anundet a marmaris torom mot, ma a taro kai anun o God, ra det kis una rumu anun a Sisa, det pitar anundet a marmaris torom mot.

²³A marmaris anun a Labino o Iesu Karisito in kis una niomot. Amen.