Filipos 4:4-23

⁴Tene alegria siempre por causa del di ustedes relacion con el Señor. Y ta repeti yo otra vez, tene alegria!

⁵Manda sabe con todo el maga gente que bien amable ustedes, cay cerca ya gayot llega el Señor.

⁶No man lingasa, sino reza lang acerca de todo las cosas. Dale gracias con Dios si ta pidi ustedes con ele, y manda sabe con ele todo el di ustedes maga necesidad.

⁷Si ta hace ustedes ansina, entonces Dios ay dale el di suyo paz con ustedes. Kita maga gente hende gayot ta puede entende si cosa ese paz, pero si tiene ustedes ese, Dios ay cuida enbuenamente con el di ustedes maga corazon y maga pensamiento para queda ustedes calmao y alegre por medio de fe con Jesucristo.

⁸Por ultimo, maga hermano, pensa siempre ustedes del maga cosas bueno que ta merece respeto. Por ejemplo, maga cosas verdad, maga cosas bueno, maga cosas justo, y maga cosas agradable y bonito. Si tiene maga cosas bueno que ta merece el aprobacion di ustedes, guarda con estos siempre na di ustedes pensamiento.

⁹Hace todo el maga cosas que yo ya enseña con ustedes y que ustedes gane ya recibi y ya aprende, y hace las cosas que ta mira ustedes conmigo ta hace. Entonces Dios quien ta dale canaton paz, ay esta junto con ustedes.

¹⁰Que grande gayot el alegria ta tene yo na di mio corazon por causa del di mio relacion con el Señor, y cay despues de largo tiempo ta ayuda ustedes conmigo otra vez! Hende yo ta habla que ya olvida ya ustedes conmigo completamente, sino que nuay lang ustedes oportunidad para manda ayuda.

¹¹Ni hende yo ta reclama con ustedes cay nuay yo nada. Ya aprende ya man yo tene alegria y esta contento con masquin cosa yo tiene.

¹²Sabe ya yo vivi na pobreza, y sabe tamen yo vivi na riqueza. Ya aprende ya yo si paquemodo esta contento masquin donde yo y masquin cosa tiempo, si con hambre o busuk, si tiene o nuay.

¹³Ta puede yo hace todo las cosas cay si Jesucristo amo ta dale fuerza conmigo.

¹⁴Pero bueno gayot ustedes, cay ya manda el ayuda aqui conmigo cuando ya pasa gayot yo dificultad.

¹⁵Y ustedes maga gente de Filipos, bien sabe que na principio cuando nuevo pa lang yo ta predica el Buen Noticia y ya sale yo na Macedonia, ustedes lang gayot el unico grupo de creyente quien ta ayuda conmigo. Ta dale ustedes conmigo maga regalo para expresa el di ustedes gracias por el ayuda del Buen Noticia que yo ya predica con ustedes.

¹⁶Y masquin talla ya yo na Tesalonica, ustedes ya manda conmigo ayuda mas de una vez para tapa el di mio maga necesidad.

¹⁷No quiere lang gayot yo recibi regalo, sino quiere yo que ay omenta el recompensa de Dios para con ustedes, por causa del cuidao di ustedes para conmigo.

¹⁸Ya recibi ya yo mucho, hasta sobra ya gayot! Y con el enviao di ustedes por medio di Epafrodito, tiene ya yo todo el que ta necesita. El di ustedes maga regalo como si fuera perfume oloroso ofrecido para con Dios, y como un sacrificio aceptable que puede dale alegria con Dios.

¹⁹Y Dios con quien yo ta sirvi, ay dale con ustedes todo el que ta falta, por medio del di suyo abundancia de riqueza. Ay dale le con ustedes por causa del di ustedes buen relacion con Jesucristo.

²⁰El honor y alabanza con el di aton Dios Padre hasta para cuando! Amen.

²¹Ta envia yo recuerdos con todo el maga creyente alli quien ta ama y ta obedece con Jesucristo, y el maga hermano na fe taqui junto conmigo ta envia tamen el di ila maga recuerdos con ustedes.

²²Todo el maga creyente di Jesucristo ta saluda con ustedes, especialmente aquellos na palacio del Rey Cesar.

²³Ojala que el gran favor del Señor Jesucristo ay esta con ustedes alli. Amen.