Pesalem 74:3-18

³Ôsêlêŋ opeŋ gamêŋ popoc tau, taŋ gacgeŋ gêc-gêc naŋ. Ojae, gêŋ samob, taŋ kêkô gamêŋ dabuŋ ŋalêlôm naŋ, ŋacjo seseŋ sugoc.

⁴Nêm ŋacjo sêjam wambaŋ ŋamelocŋageŋ aŋga nêm gamêŋ, taŋ lau sêkac tauŋ sa sêmoa naŋ. Êsêac sêguŋ nêŋ bam kêkô gebe gamêŋ tonaŋ kêtu êsêacnêŋ.

⁵Êsêac têtôm kômwaga saleŋŋa, taŋ sêsap ka tulu ŋa nêŋ ki naŋ.

⁶Êsêac sêga katapa toŋatalô popoc ŋa nêŋ ki to hama kapôêŋ.

⁷Êsêac sêkêc nêm gamêŋ dabuŋ ja geŋ su ma seseŋ nêm ŋaê ŋaandu ŋadabuŋ su e gêjaŋa samucgeŋ.

⁸Êsêac taêŋ gêjam gêc tauŋgeŋ gebe “Aêac danseŋ êsêac su e tomalageŋ.” Ma sêkêc Anôtônê sakiŋ dabuŋ ŋamala samob, taŋ kêkô-kêkô naŋ, ja geŋ su.

⁹Aêacma gêbôm dabuŋ samob maleŋmê. Propete teŋ gêmoa kêtiam atom, ma aêac samob ajam kauc ŋanoc gêŋ tonaŋ oc êmbacnê êndêŋ ondoc.

¹⁰O Anôtô, kalomtêna oc sêsôm nêŋ biŋ susu e êndêŋ ondocgeŋ. Ŋacjo oc sêŋgôm aômnêm ŋaê oc êtu meloc endeŋ tôŋgeŋ me.

¹¹Amboac ondoc kôtaiŋ lêmam su. Amboac ondoc kôkapiŋ lêmam tôŋ.

¹²Mago Anôtô kêtu aêŋoc kiŋ gêdêŋ andaŋgeŋ tauanô. Eŋ gêjam ŋamalac sa kêtôm nom ŋagamêŋgeŋ.

¹³Aôm gôwa gwêc kakôc ŋa nêm ŋaclai kapôêŋ ma golo secsêga gwêcŋa môkêapac popoc.

¹⁴Aôm gôga bôcsêga Lewiatan môkêapac kêkôc ma kôkêŋ eŋ ôli kêtu bôc gamêŋ sawa nêŋ.

¹⁵Aôm kôkêŋ bumata kêpulu to keseleŋ. Aôm gôwa bu kapôêŋ-kapôêŋ gêŋgic-gêŋgic e ŋakeleŋ kêsa samucgeŋ.

¹⁶Aôm kôtu geleŋŋa ŋatau. Aôm kôtu gêbêcauc ŋatau. Aôm tec kotoc ajôŋ to oc sêkô maleŋ.

¹⁷Aôm gôjac lôcawa nom e gêdêŋ ŋamadiŋ. Aôm kôkêŋ oc kêsa to komôgoc.

¹⁸O Apômtau, taêm ênam gebe nêm ŋacjo sêômac aôm. Êsêac sêkac tauŋ su aŋga aômnêm ma sêgôm nêm ŋaê kêtu gêŋ meloc.