SALAMO 74:3-18

³Vada e hekohutani vaitani hanuana ba raka henia kahi; inai taudia ese gabu helaḡana vada e habuaia tari.

⁴Oi inaimu na emu gabu helaḡana bogaraginai vada e ḡou; sibodia edia toa vada e hagini, una gabu toana ai baela.

⁵Atai iduarana ai perepere audia na ira amo e tara patapata;

⁶au amo e koro ḡaudia iboudiai na ira bona hama amo vada e hamakohidia.

⁷Emu gabu helaḡana vada e doua, oi ladamu e noholaiava gabuna vada e hamiroa tari ela bona tano.

⁸Idia na e hereva heheni, eto “Aita hadareredia vaitani”; idia ese Dirava ena hebou gabudia iboudiai e doudia, tano idoinai.

⁹Ai toamai na asia itadiamu, asi emai peroveta tauna ta, bogaragimai ai nega ena daudau idibana tauna ta lasi.

¹⁰Dirava e, inai taudia bae kirikirilaimai ela bona edena nega ai? inai tauna ese oi ladamu baine ihi-ihiraia hanaihanai a?

¹¹Dahaka dainai oi imamu o veria loumu? Badina be dahaka oi imamu idibana na kememu dabuana ai o huniamu?

¹²Ḡau tamona, matamana negana amo Dirava na egu Pavapava; tanobada bogaraginai ia ese ena hahemauri karadia e karamu.

¹³Oi siahumu amo davara o hapararaia; lakara-donodono kwaradia o huaridia.

¹⁴Leviathan kwarana iboudiai o huaridia patapata, tano ḡaḡaena taudia o henidia, adia.

¹⁵Tano o hapararaia, ranu baine lohilohi bona baine aru totona; e aru hanaihanaiva sinavaidia o hakororodia.

¹⁶Dina na oiemu, hanuaboi danu oiemu, diari o karaia, bona dina danu.

¹⁷Tano hetoadia iboudiai oi ese o kara; lahara negana o karaia, bona guitau danu.

¹⁸Iehova e, inai taudia edia heihi-ihirai ba laloa tao, asie matauraimu taudia na oi ladamu e ihi-ihiraiamu danu.