Pesalem 27:4-13

⁴Aê kateŋ gêŋ tageŋ gêdêŋ Apômtau ma ŋoc ŋalêlôm kêkac aê biŋ tageŋ tonecŋa gebe jaŋgôŋ Apômtaunê andu êtôm ŋoc bêc jamoa matoc jaliŋa samob gebe jalic Apômtaunê ŋajam ma jateŋ eŋ gebe êwê aê.

⁵Gebe êndêŋ bêc ŋawapacŋa eŋ oc êsiŋ aê jaŋgôŋ ênê bec ŋalêlôm. Ênê bec ŋagadê oc ênsaŋ aê auc. Eŋ êsuŋ aê sa najaka poc ŋajaŋa tôŋ.

⁶Amboac tonaŋ tecbeloc aŋgeŋ êndêŋ ŋoc ŋacjo, taŋ sêgi aê auc naŋ. Aê gabe jakêŋ da aŋga ênê bec ma jakêŋ toôndugeŋ. Aê jaŋga wê ma janam êndêŋ Apômtau.

⁷O Apômtau, ôkêŋ taŋam aê gebe aoc gêjac aôm kapôêŋ. Taêm walô aê ma ôkêŋ taŋam aêmaŋ.

⁸Aôm kôsôm gebe “Ansom aê.” “O Apômtau, amboac tonaŋ tec gabe jansom aôm.”

⁹Ôsiŋ laŋôm aê atom ma ôtiŋ nêm sakiŋwaga su totêmtac ŋandaŋŋa atom. O ŋoc kêsiwaga Anôtô, aôm kôtu ŋoc gêjam-sa amboac tonaŋ ôtiŋ aê su to ônac kapoac aê atom.

¹⁰Tinoc agêc tamoc sêwi aê siŋ su, mago Apômtau oc êkôc aê sa.

¹¹O Apômtau, ôtôc nêm intêna êndêŋ aê ma ôwê aê jasa gamêŋ tapa ŋajam. Ôŋgôm êtu ŋoc ŋacjoŋa.

¹²Ôwi aê siŋ jandêŋ biŋ, taŋ ŋoc ŋacjo sêkic naŋ atom. Gebe biŋ-gêgawaga dêdi sebe sênac aê ma sêjac tênêp gebe senseŋ aê su.

¹³Aê kakêŋ gêwiŋ gebe jalic Apômtaunê ŋajam aŋga gamêŋ sêŋgôŋ mateŋ jaliŋa.