SALMOS 27:4-13

⁴San se tlamantli nijtlajtlanijtoc TOTECO. San se tlamantli nijnequi. Nijnequi niitztos ipan ichaj TOTECO nochi tonali. Nijnequi nijhueyichihuas nepa huan nimopaquilismacas ica nochi ihueyitilis huan itlatlanex. Quena, ipan ichaj nijtemos tlen ya ipaquilis.

⁵Quema ajsis tonali tlen ax cuali, TOTECO nechmocuitlahuis. Nechtlatis ipan itiopancal campa más tlatzejtzeloltic, huan teipa nechquetzas ipan se hueyi tetl para nechhueyitlalis.

⁶Quena, nechhueyitlalis iniixtla nocualancaitacahua. Yeca na nijtencahuas tlacajcahualistli ipan itiopacal, huan nitzajtzis ica paquilistli. Nihuicas huan nitlatzotzonas para nijpaquilismacas TOTECO.

⁷TOTECO, xinechtlacaquili pampa nimitznojnotza. Xijpiya hueyi moyolo noca na, huan xinechnanquili.

⁸TOTECO, quema tinechilhuía: “Xinechcamahuiqui”, na nimitznanquilía: “Nimitzcamahuiti”.

⁹¡Amo xinechnenetlatili! ¡Amo xinechhuejcamajcahua pampa ticualantoc nohuaya! San ta tlen tinechpalehuía, noTeco Dios, ta tlen tinotemaquixtijca. Amo xinechiyocacahua, niyon amo xinechcajtehua noselti.

¹⁰Yonque notata huan nonana nechtlahuelcahuase, TOTECO, ta nochipa tinechmocuitlahuis.

¹¹TOTECO, xinechnextili tlen tijnequi ma nijchihua. Xinechyacana san ipan nopa ojtli cuali campa tijnequi ma ninejnemi, pampa nocualancaitacahua nechyahualohuaj.

¹²Amo xinechtemactili ininmaco queja inijuanti quinequij, pampa noca na motlalantoque tlacame tlen istlacatij huan san quimatij tlen más fiero nechchihuilise.

¹³Pero na cuali nijmati TOTECO nechmanahuis, huan sampa niquitas quejatza cuali iyolo nohuaya ipan ni tlaltepactli campa niitztoc.