Pesalem 27:1-9

¹Apômtau kêtu ŋoc ja to ŋoc moasiŋ, amboac tonaŋ oc jatêc asa. Apômtau kêtu katucnê lamu, amboac tonaŋ oc jaê go asa.

²Lau sec embe sênac aê gebe senseŋ aê su, go êsêac, taŋ têtu ŋoc soŋo-soŋo to ŋoc ŋacjo naŋ, sêka selelec e sêu tauŋ.

³Siŋwaga taêsam embe sêŋgi aê auc, oc ŋoc ŋalêlôm ŋatutuc atom. Ma êsêac embe sênac siŋ êndêŋ aê, oc têtac êpa sugeŋ.

⁴Aê kateŋ gêŋ tageŋ gêdêŋ Apômtau ma ŋoc ŋalêlôm kêkac aê biŋ tageŋ tonecŋa gebe jaŋgôŋ Apômtaunê andu êtôm ŋoc bêc jamoa matoc jaliŋa samob gebe jalic Apômtaunê ŋajam ma jateŋ eŋ gebe êwê aê.

⁵Gebe êndêŋ bêc ŋawapacŋa eŋ oc êsiŋ aê jaŋgôŋ ênê bec ŋalêlôm. Ênê bec ŋagadê oc ênsaŋ aê auc. Eŋ êsuŋ aê sa najaka poc ŋajaŋa tôŋ.

⁶Amboac tonaŋ tecbeloc aŋgeŋ êndêŋ ŋoc ŋacjo, taŋ sêgi aê auc naŋ. Aê gabe jakêŋ da aŋga ênê bec ma jakêŋ toôndugeŋ. Aê jaŋga wê ma janam êndêŋ Apômtau.

⁷O Apômtau, ôkêŋ taŋam aê gebe aoc gêjac aôm kapôêŋ. Taêm walô aê ma ôkêŋ taŋam aêmaŋ.

⁸Aôm kôsôm gebe “Ansom aê.” “O Apômtau, amboac tonaŋ tec gabe jansom aôm.”

⁹Ôsiŋ laŋôm aê atom ma ôtiŋ nêm sakiŋwaga su totêmtac ŋandaŋŋa atom. O ŋoc kêsiwaga Anôtô, aôm kôtu ŋoc gêjam-sa amboac tonaŋ ôtiŋ aê su to ônac kapoac aê atom.