Paisowa 27:24-39

²⁴Na iyen, “Paulo, tabu u ꞌwasabu! Baꞌisa Sisa bena ai matana wa obiyo. Be Yaubada ena loholoho um lisim yai, debana yai mate salumadi maidam ami awa, ibege ti peꞌi.”

²⁵Be tatau, nuwamiu ti adidili! Yaubada E kawawananahaꞌen mate somo ya falibagu haba ya tubu.

²⁶Be haba bonabonaluwa laꞌi ainiya te oi hiti hasa.

²⁷Hwayau ya towatowa na ꞌe aleꞌalele maihona ouꞌoulina 14 Mediteleniya Gabogabona yai. Iꞌipa atipuna yai waga tau paisowa amna sa atahi mate fote sa hanahanaui.

²⁸Yo fede mahina duduna yai ginauli hesa mwahumwahuna sa au na sa fadalolo lidiyen gabogabo, be oula lofana sa lufa. Sa lobahi mate lofana 40 metres. Hige walolona na sa lufa bodai. Matabahim begana ya fote, lofana 30 metres.

²⁹Yo fede sa ꞌwasabu, ibe waga ti fatata hitiꞌi, be anka fati sa fadalolo lidiyedi waga mulina yai, na sa lauꞌuꞌula bena ya lahai.

³⁰Waga tau paisowa bena waga sa gela afulen; be fafaꞌoituhu sa fadawe lidiyen gabogabo yai, edi bwala bena haga anka haba ai waga kuluna sa fabuludi.

³¹Be Diuliyesi yo tau hiyala, Paulo ya falibadi iyen, Yena waga tau paisowa hige ai waga ti miya, haba ami peꞌi.

³²Yo fede, fafaꞌoituhu balawadi, tau hiyala sa tomofahi be ya alele.

³³Begana haba ya ifi tatatali, mahudoꞌidi Paulo ya falibadi iyen, Au kalahe, paꞌana wiki luwaga hige somo hesa au an.

³⁴Lisina yai aho te, E anꞌetaimiu, bena ami anꞌan, haba taumiu sa adidili be ibege sai laꞌi u peꞌi.

³⁵Paulo ya falibadi mulina yai, fwalawa tefana ya abi be ya ifi na Yaubada ya lautoꞌiyen. Habahim ya an, mahudoꞌidi matadi yai.

³⁶Mahudoꞌidi nuwadi sa adidili fuyo be sa anꞌan.

³⁷Tau awa waga yai mate, oulimai 276.

³⁸Mahudoꞌimai ꞌe kalahe maꞌuda, waga ana kaihusa, witi, sa lofe lidiyen gabogabo yai, be waga ya malaha.

³⁹Ya ifi tatatali, nuꞌu hige ti ita lobahi, in moho gelegele sa ita gadowa yai be ana halulu sa lau bena ainiya sa duna.