Ol Provep 6:12-35

¹²Wae aanu nimimi yaa agaa ora waru temede.

¹³Nimuna wae aa yagonumi adenalo gupa peme. Ne makirate rabu kimi page àà-me page inimi robo page sua nimuna waea pape agu mea wateme.

¹⁴Oro yalo nimumi waea pape madaa kone rulaawa aanu medaloma kone wae ma-saaeme.

¹⁵Goa peme raburi nimu kedaa adaa aipapulu meme rabu go kedaa wala ma-epeape-rupa kalai pua omalimi.

¹⁶Adaa Aa-me pupitagi ne kone ipa kerepopu (7) peme-a luabu madaa-re nipumi raana na-omea.

¹⁷Wae pupitagi ne-para aa yago meda adoa go aare pinawa kone imiapara, yaa agaa temena. Go page re-para aa yago meda re-nai madaa pama tumaomaeme. Nimumi waea pape madaa agu kone mapiraeme-para, waea pape-para pupitagi neme. Wae pupitagi pape madaa kone mapiraeme-para koso madaa yaa agaa adaapu teme. Go page nimuna amenu rapu agaa rado rado loa wae-kone masaeme.

²⁰Go naaki neme nena ama aapa laapo-na agaa pagoa ratape. Nipumi tepe agaa narasalepape.

²¹Neme nipuna agaa kone-para mea sua oro yalo ratape. Go konere nena maa-para maasape kulubu-rupa masua pirali rabu ora epealia.

²²Ne pora pamulalo pali rabu go agaa-me epe pora mea watea. Ne u-patali rabu page go agaa-me ne surubalia. Ne u-patua rekali rabu page go agaame epe kone wasupa gua surubalia.

²³Nena ama aapana agaare laba paame pora mea watade-rupa mada ne pora mea watea. Nena ama aapa lapome ne go agaa lagialipi rabu go su-amaa epe-rupa aawape pora mea watepe.

²⁴Nipuna agaa-me ne rabamealipi rabu, ona wae-me ne kotulalo mada na-epalia. Aa medana oreme epe redepi agaa lagialia page napagape.

²⁵Neme go onana epenape-nane to madaa epaame naomape. Go rabu nipumi paake nalipinalo ne adoba saliaga nipu aae repara napope.

²⁶Gore aa medame paake aa rume ona raapu paake nalia-dare adaa yoto nakaloa pea. Gore pa oge etana yotosi peade-rupa mada kata. Gupa yapare aa medana ona raapu paake pupitagi no patalipi-daare adaa yoto waru rubalia. Goa pua nipuna bipa nipuna kone wasupa page tumaomalia.

²⁷Gore neme repena egaa ako-para mea pagali raburi nena ma-raalide seti mada naralia ya?

²⁸Go page repena egaa ralaina àà-me rabua talimi raburi nimina àà page mada naralia ya?

²⁹Padane go-rupa aguri ne aa medana ore raapu paake pupitagi no patalipi-daare neme adaina kone ianu palimi.

³⁰Gore aa medame page nipu reaeme omoa aa medanuna maapu paake-nea raburi, go maapure onaa-me go aa nipu abi natemede.

³¹Go yapare nimumi go paake-ne adasalimi rabu nipu koso laawa adialimi rabu oyae adaapumi abutea. Gore nipuna ada-para i oyae luabu ma-diayape-rupa madame abutea.

³²Go yapare aa medame mo aa medana ore raapu patua nipumi paake yotea-dare go aa nipu waea adaape pea. Aa medame pupitagi nalia-dare nipuna bipa nipu ma-oyaaya.

³³Gore aanumi nipu tua yala mapolaawa aape teme rabu oroyalo yala pola aalia.

³⁴Aa medame aa medana orenu raapu paake no pataliare onaa luabumi go aa ratu yawalimi. Go-rupa aguri mo aani nipumi go aa nipu radaa nena tua waea palia. Go aa nipu ogesi-da odome omape-re ora mada dia.

³⁵Goa pua rono lorenalo mone adaapu aani kate-pare mada namealia.