Ol Provep 28:1-13

¹Waea pi aanuri pama paala omo nimu pagola peme. Goa peme pare epe kone i aanuri mena laiyano aaya-rupa puri aaeme.

²Kantri meda-para piri onaame nimuna gavman senisi pulalo yada palimi rabu kagaa alopape aa mudu rado re-para alopatalo peme. Go yapare aa mudu epeme surubolalo paliare ada kantri epe-rupa pa aalia.

³Aa medame naraame ome aanu rabuniaatalo palia-dare gore yai adaa ipua e maapu marateade-rupa mada pea.

⁴Rekena i agaa rasitemere wae yae peme aanuna bi minasaeme. Rekena agaa ratua pimi aanumiri waea peme aanu rabuaniaaeme.

⁵Waea peme aanumiri epe porare ake piaene yapalo nimu ora na-ademe. Goa peme pare aa medaloma Adaa Aa ratulalo peme onaare epe pora ademe.

⁶Aa meda nipu oyae dia yaliare epe aa yaliare amo ne aame pea luabu rabuaaya.

⁷Ogege-aame rekena i yaenu luabu ratua palia-dare epe kone ia. Pupitagi noa yada yada pi aanu raapu aalia-daare nipuna agi aaraanu yala polo pitimi.

⁸Aa medame mone rudu minaloa onaa repara poropete adaapu waria mealia pare mada nasaalia. Dia, pare araanu rabameme aana kinane palia.

⁹Aa medame rekena i agaa narataliadare Gote-me go aana beten napagalia. Gote-me go betene pageare pugu waru pugu pea-pulu mada napagalia.

¹⁰Aa medame epe aa meda makiraatalo paliare nipuna paliade waeame nipu wala mapiraalia. Go yapare aa meda nipu wae yae napi pawa aaliade-daare Gote-me go aa nipu epe epe yaenu mada katea.

¹¹Oyae adaapu i aanu nimu ora makuae yae ima kone imi pare naraanu kone waru sua amope aanuna kone makuaaeme.

¹²Epe redepone aanumi nimuna kantri surubolalo peme raburi onaa luabumi go aa madaa ranaame waru omeme. Wae aanumi mo kantri surubeme raburi onaame palaa omoa nipu kaledeme.

¹³Aa medame nipuna wae yae pawa kudiripu pa ina kone sua piraliare go aame epea napea. Go yapare aa medame nipuna wae-yae luabu lapedepealia-dare Gote-me go aa nipu odome omoa raba mealia.