Ol Provep 27:6-12

⁶Nena adami aanumi nimu raba meainalo radaa ora waru mea geme palo peme. Pare mo nena yada-lore aanumi epea pua ne makira teme.

⁷Aa medame eta luabu noa pua nipuna robaa-para rubita raburi alubi apaa ora ota pare reame ome aame rero pi eta nea rabu ora mada nalia.

⁸Gore aa medame nipuna su ada gimoa pa pora pamu aaliare yaame nipuna piri-para gimoa pa riyaa pamuaya-rupa mada pamea.

⁹Waele-sada page ora epe wabala waele luabu pema raburi niaa mada ora epe ta kone sua pedo waru pema. Go page niaana adami aanumi niaa raana masaawa niaa rabameape kone imi epe agaa loa epea pemede-rupa mada yade.

¹⁰Nena ona nogo naakinu-para nena adami aanu masaa narilape. Go page wae yae medame ne epaa mulalo paliare gore ne rabamina nena ame na-adola pope. Aa meda ne raapu repara pirali-daare go ame su adaalu-para aaya page rabuniaaya.

¹¹Naa naaki neme epe kone luabu mua epe pora luabu ratali-dare ne madaa epe kone salua. Goa pua aa medame nipara pa mariae agaa teadare neme nipuna agaa mada abutoa.

¹²Epe kone i aamere gore nipumi ora go-rupa makuaaya. Kedaa nipu mada epolalo palia-daare gore nipumi aipapulu mapakeaalia. Goa pea pare epe kone na-i aare gore mo pora wae i-para pea rabu page go wae yaeme nipu ora mea rabu ora aipapulu kedaa mu aaya.