Ol Provep 26:3-28

³Aanumi ose-mena aipapulu penalo aipuya unimi teme-rupa mada yade. Gore dogi-menana agaa-para aeyane-me pora epe-rupa ma-puaeme-rupa peme. Wae maeyae peme onaa goa napape loa teme-rupa mada yade.

⁴Aa meda nipu epe redepone kone nasalia-daare nepara epe agaa meda natea. Goa palia-ga neme nipuna agaa na-abulape: Neme nipuna agaa abute raburi wala nipumi pea pali.

⁵Epe kone nai aame ne-para wae agaa tea-daare nipuna agaa abulape. Na-abute raburi nipumi makua kone ora epeta kone salia.

⁶Kone waru na-i aa meda-para go agaa laketa pu loa penatedare gore nena ne bipa ne maoyaayawa nena ke mea kepe rube nona palia.

⁷Epe kone napiri aame epe agaa meda lano kone sua tea-daare mogo tea agaa epe-rupa mada natea. Go agaare ke wae aa-na pora pamea-rupa rado yade.

⁸Epe kone nai aa meda aa mudu bi kateme-daare nipumi etaa madaa aana mapagaawa pitalo peme-rupa mada peme.

⁹Aa meda epe kone nasua nipumi epe agaa meda pa lano kone sua tea-daare ipa bia neme aanumi ope etolo etolo-ae kimi ripinaae nona-palia.

¹⁰Surube aame kone waru na-i aanu kogono katalo paliare onaa adaapu ae-para etaa mada pi moneaya.

¹¹Kone waru na-i aamere nipuna abade maeyae-rupa wala maeyaaya. Go peare yana-me maaku ratu ruboa wala mea neade-rupa mada pea.

¹²Aa meda epe kone nasaliadare niaame nipu mada rabamua epe kone mogealima pae? Maria. Pare go aa nipumi oyae luabu makuaayo kone salia-dare niaame go aa agaa mana loa rabameape-rupa mada dia.

¹³Kiaa rakepene aa nipuna adapara pa piruaawa nipumi gupa ta. Mo pora mena laiyono aaya kone sua pala omoa napea.

¹⁴Kiaa rakepene aa nipumi nipuna ada runane patua pereke pereke tupia ada dua warini inisisi lego lego malaawa runane piruaaya.

¹⁵Kiaa rakepene aame eta aipapulu mea nolalo nipuna ki pelete madaa ia. Goa pea pare nipu mo eta minasaawa agaa-para mea nape-rupare puri na-ia.

¹⁶Kiaa rakepene aame epe kone i aa (7) kerepopu na kone rabuaayo kone ia. Goa kone sua nipumi aakone waru ia.

¹⁷Gore aa laapome yada yada pua ratu yawalipi rabu aa medame nipu pua rabamealia-dare go aa nipu yana pupulaina aane pua ripinae nona pia pea.

¹⁸Aa medame nipuna adami aa makiratalo puare wala orope gupa tea. Neme pa raapa agaa lawade ta. Gore maeyae aame repena agaa lusu ruboa etaane rubebe mada pea.

²⁰Repena kaapu repena ralae-para na-iralimi raburi gore repena naralia. Go page aanumi maa agaa natemere go yaweme ratu dia yalia.

²¹Repena kaapu waru iritimi rabu repena ora waru reade. Gorupare ada pi agaa ta aamere yada agaa ora ma-adaayaya.

²²Niaame aa yago medana maa agaa pame rabu go agaa pagape madaare raname waru omema. Go teme agaa-re epe ta kone sua epe eta-rupa mea neme.

²³Aa medame epe-rupa awape agaa puri paloa tea-daare ora yapare mo konena rere waea papena ta. Gore sumi warini sosopen-rupa yapare wala silipa golme warini nona mapaaeme.

²⁴Gore aa medame aa yaago meda raname na-omaliare pa agaame makirae kone sua nimu rana omana kone inalo pea. Nipu makinae kone sua pea.

²⁵Go piaene aanuna agaare nena aaneme pagape mada ora rede waru palia pare neme nipuna agaa madaa kone narulape. Gore akolo ya? Nipuna kone pu robaa-para wae kone luabu pa rubitabea.

²⁶Nipuna pu lo robaa-para ia wae kone raayo pagaa salia pare onaa luabumi nipuna wae kone adoa makualimi.

²⁷Aa medame nipuna bipa nipu wae yaenu pa pu aano kone sua paliare nipuna bipa nipu otaa. Gore aa medame koyati pa onaa awena kone sua ia pare wala nipuna bipa mo koyati patemede-rupa mada pea. Gore aana agaare rudu madaa sone mea pea pare wala perene ipua nipu epa tea-rupa mada yade.

²⁸Aa medame aa yago meda yaa agaa medaloma laketea-daare nipumi yaa agaa loa onaa ma-oyape mada pea. Aa medame oro yalo omeme pi agaa teare gore aa yago ma-oyaatalo pea.