Ol Provep 25:2-21

²Adaa Aa-me oyae-yae luabu nipuna kone-para pagaa su pia. Goa pea nipu adaa bi katema. Goa pea pare aa mudu king-mi oyae luabu kudiripu ia-da nipumi adesaatalo kogono kalai adaapu pea. Go page niaame king-an bi minasaatalo pema.

³Niaame king-na ia kone luabu mada na-ado kiritalima. Gore go-rupa madaa niaame oyae luabu so yaa-para ia page no ipa solowara runane ia yaenu page mada na-adema.

⁴Aanumi aana silva irua ora ria mealimi. Goa pua ora epe pelete mada warialia.

⁵Go-rupa agu waea peme aanu ratu rubalimi raburi nimu mo king raapu mada napiraalimi. King-mi epea palia raburi mo ora epe ada kagure puri paloa aalia.

⁶Ne mo aa mudu king raapu aalidare ni page aa adaa yade kone sua neme aakone nai pawa aape.

⁷Ne adaa aa piritalo palidare orope nipu ipua ne epa ratalia rabu wae-para pali. Goa palia-ga ne pa aa naraanu raapu pirua orope ne mo adaa aa-rupa pua pira teme rabu pirita paina.

⁸Neme waea paedelo aipapulu yaa agaa mariaawa koso nalata pope. Gore aa medamene adoa makirae koso ne aa yade teare neme ake pali yapae?

⁹Nena adami aa raapu yae meda madaa agaa talo pali-daare ne mo nipuna ada-para pua agaa maredepoya tapape. Pare neme agaa kudiripi meda aba pagaliri nalapedepeape.

¹⁰Wala orope go agaa kudiripi lapedepeali rabu go aame agaa pame lapedepe ta teme rabu ne yala mapolalimi. Goa pua ne madaa oro yalo wae kone-su aalimi.

¹¹Go yapare aa medame agaa ora epe-rupa meda lapedepealia raburi go aa nipuna agaare golome warini piksa-rupa madaa goa pua pepenare silpa-na pepena pae nona palia.

¹²Epe kone i aamere nipuna adami aa maredepo yaya. Goa pua mo nipuna adami aame nipuna aa-na agaa epeta kone saliadare nipumi golome warini epe yae meata-rupa la.

¹³Go yapare agaa lama epaliade aame nipuna surube aame tea agaa redepona lama epalia-daare nipumi nimu raaname epe-rupa omena tea. Gore aanumi nimuna maapu-para ipa kogaare nemede-rupa mada mealimi.

¹⁴Onaa medalomame oyae ode meda katema loa wala nakatemere yai naepe pa poripu-para moae epeade-rupa mada agaa teme.

¹⁵Gore neme agaa pawa kumupu loa nena agaa napagolalo pi onaame page wala pereketua raana omoa nena agaa mada pagalimi. Goa pali rabu aa adaanu page nimuna kone mada perekealimi.

¹⁶Gore neme alubi apaa medaloma repena apaa-para ina adaliri nena etaa ne robo-para nape. Neme ora adaapu nano kone sua adaapu nali raburi nena robaa rubia maaku ratali.

¹⁷Go page nena adami aa-na ada-para oro yalo napope. Nena adami aame ne gime omalia.

¹⁸Aa medame nipuna adami aa-para pa mariaa agaa teare etaa page rai page repename temede-rupa nipuna adami aa go tea.

¹⁹Neme yaa agaa ne aa meda adalidare wae yapi di rabu ni rabamina kone salidare ne agaa odonalo pi aame eta neade nonapi aa yalia. Go page ke odonalo pi aame pora pameme-rupa mada yalia.

²⁰Neme aa medana lo robaa kedaa ina piru aalia rabu go aa rabamealua kone sua neme rupa-yasa te pare mo aa mada narabameali. Go piaene aa-re poripu epea rabu seti kolo rabua aipame rere madaa kiraawa peme-rupa mada yade.

²¹Nena iaa meda reaeme omalia-daare eta kalape. Ipa nalame omalia page neme ora kalape.