Ol Provep 21:9-26

⁹Aa meda nipuna ada gaa-para pawa pirua ona-nogo naki raapu pawa piralia-daare epe ta. Pare nipu agaa wae adaapu ne ona raapu piraliare oyalia.

¹⁰Waea pape madaare reaeme omema-rupa mada pea-pulu waea adaapu pape mada aa meda odome naomeme.

¹¹Epe kone naimi aanumi adenalo mo waea pupitagi ne aanu tu adialimiri mo rudu kone sua pimi aanumi adoa epe kone mealimi. Goa pua nimuna makuae yae ora adaa yalia.

¹²Adaa Aa-na kone ora redepone kone ia. Goa pea-pulu aanumi nimuna ada-para waea peme luabu Adaa Aa nipumi waru adoa makuaaya. Goa peapulu Adaa Aa-me go aanu nimu luabu maoya-talia.

¹³Naraame-ome aanumi nimu rabaminalo yatemede agaa napagali-miri orope ne yatede agaa mada napagalimi.

¹⁴Gore aa medame ne ratu yawaliare neme oyae ode medaloma go aa nipu kalape. Ne kudiri pua ne naadalimi rabu nipuna ratu mada dia yalia.

¹⁵Gore onaanumi epe pora ratua epe kone sua koso eperupa peme raburi epe-rupa piri onaame adoa raaname omoa pedo palimi. Mo waea peme onaame goa adoa nimuna lo robaa-para wae kone meme.

¹⁶Aa medame epe kone sape gimoalia pare nipu omoa paliare aba omoa puaa pimi onaa raapu puaa piralia.

¹⁷Aa medame epe eta noa oro yalo ipa waene noa raaname omo-aaliare nipuna amo dia yalia.

¹⁸Epe aanu madaa keda popolalo palia pare wala pereketua mo pupitagi no aeme aanu madaa alopawa popalia.

¹⁹Gore aa meda eta oyaenu waru naope-pare awaliare epeanu luabu rabuaaya. Goamere ona ratu yawo agaa adaapu ne onanuna kone page rabuniaaya.

²⁰Epe kone su epe pora ratua piri aana ada-para oyae ora epe-rupa pa su-aaya. Go yapare wae kone su wae pora pameme aanuna oyae diata rabu pa piru-aaeme.

²¹Go yapare aa medame aa yago raaname waru omoa epe pora rataliare nipu raana rubia adaa bi kateme-pulu epe-rupa piralia.

²²Yada yame pi aanu epe kone katea rabu ada kagure meda mada pabo tua winipu mealimi. Aanu nimuna ada kagure pape ora puri pata-pulu nimuna ada kagurena pape mada narasalimi. Mo yada pi aanu yada pula palimi rabu ada kagure pabo tu rubalimi.

²³Gore aa medame nipuna agaa-abulu waru suruboa aaliare go aa nipu madaa kedaa meda mada naepalia.

²⁴Wae pupitagi ne aakone su aame waea pua aa yagonu-para page wae agaa teme. Goa pua oro yalo nipuna bi agu minasaatalo pea.

²⁵Kiaa rakepene aa nipu kogono napi pa oyae meape madaa aaya. Goa peapulu nipuna raana omea koneme nipu tumaomalia.

²⁶Kiaa rakepene aame oro yalo oyae pa meape madaa kone su pia. Pare epe kone i aamere nipuna oyae pa aanu katae.