Ol Provep 20:9-23

⁹Niri Gote-na ini-agaa mada ora epe redepone aa awayolo aapimi mada tea pae? Goa pua neme wae yae meda napawa teme?

¹⁰Onaanumi oyae kabenalo pare aa medame makirae agaa tea-daare Adaa Aa-me go kone adoa rumaamina.

¹¹Niaame naakinu aba adoa rumaema nipu epe naaki nipu wae naaki lo. Go rupa agure niaana naakanuri aba adoa makuaema.

¹²Adaa Aa-me niaana ini mariayare oyae adamonalo pisa aane ma-saare agaa pagomonalo pisa-ga waru adamina.

¹³Ne oro yalo u-pati aa yaliare mone oyae diayalia rabu naara pirali. Go yapare ne aipapulu rekoa kogono pali-dare nena maapu-para eta oyae adaapu sali.

¹⁴Aa meda oyae kabolalo pea pare mo yaena yoto ora adaa pea rabu nipumi agaa adaapu ta. Mo yae aba kaboria pua nipuna adami aanu-para gupa pua ta. Go yaere mone ogesi pe yae meda kaboa mea ipulu ta.

¹⁵Epe kone imi onaana agaa teme raburi pa aa medalomana golo rabuaeme.

¹⁶Gore aa medana yago nipumi pa aa medana rudu abulalua agaa loa yapare wala na-abuteadaare waea pea. Gore nipumi epea go napea-daa. Gore aa-me go piaene agaa meda teadare neme oyae meda mo rudu abune nona pina ora meape.

¹⁷Yaa agaa loa mua ne etanuri rede pi eta meda kone i pare oropere go paake ne etare wae yae yana kone sali. Go mea ne etare nena agaa peto-para ipa mu-rupa kilulu tea.

¹⁸Neme epe kone aba mealiri orope nena palide kogono epealia. Nena yada-lore aa raapu yada pulalo pali-daare neme yada akepu palua palo kone waru niminaawa pape.

¹⁹Aa meda yago mada maa agaa pawa yaa agaa ne aa raapu ne ada mua naape. Goa pua neme kudiripi agaa meda lakete rabu wala mo aa meda pua lakeloa laame tea. Aa go-rupa teadare gipia.

²⁰Aa medame agi aaraanu wae agaa teare go aa nipu ora omalia. Gore laba ribaane-para udinita-rupa mada palia.

²¹Aa medame agi aaraa lapo pa pirina nipuna moae luabu aba mealiare go oyae luabu epe-rupa mada nasalia.

²²Aa medame ne-para wae paliare neme nipuna wae-yae abi na-abulape. Dia Adaa Aa-me ne raba mealiaga nipu kone rulape. Goa paliri rabu nena kedaa luabu diayalia.

²³Aame oyae kabenalo ruma sua yaa agaa tere Adaa Aa-me go mada raaname naomea.