Ol Provep 20:2-17

²Aa mudu king nipumi ratu yawoa puri pane agaa ta rabu onaa paala ma-saaya. Gore mo kiraa mena laiyono-me buai ta-rupa mada king-mi goa pea. King nipu raatu mayawaaliri nena kagaa piraama lama pope kone wasupa alupalia.

³Aa medame yada pape kone gimaliare nipu epe bi mealia. Go yapare epe kone na-i aamere oro-yalo yada pape agaa agu loaalia.

⁴Kiaa rakepene aame eta wai poape yapi di rabu maapu su naweare kiaa rakepe pea. Eta naape yapidi rabu naape awolalo pea pare nipu e napoae aame maapu-para pama asapula pea.

⁵Aa-na konere ipa ini adaa naaku piade-rupa mada yade. Aa meda kone waru makuae aa yaliare go kone ora so mada popea.

⁶Aa adaapumi nimuna adami onaa raaname omema lo gupa teme. Go yapare aa medana adami aanuri padane padane laatapu aalimi.

⁷Gore aaraa ora epe kone sua epe pora ritua piralia rabu nipuna sinumi raana omalimi.

⁸Gore aa mudu king nipumi koso pagolalo pea raburi mo kaso ta epeme aanuna kone waru adoa rumaaya.

⁹Niri Gote-na ini-agaa mada ora epe redepone aa awayolo aapimi mada tea pae? Goa pua neme wae yae meda napawa teme?

¹⁰Onaanumi oyae kabenalo pare aa medame makirae agaa tea-daare Adaa Aa-me go kone adoa rumaamina.

¹¹Niaame naakinu aba adoa rumaema nipu epe naaki nipu wae naaki lo. Go rupa agure niaana naakanuri aba adoa makuaema.

¹²Adaa Aa-me niaana ini mariayare oyae adamonalo pisa aane ma-saare agaa pagomonalo pisa-ga waru adamina.

¹³Ne oro yalo u-pati aa yaliare mone oyae diayalia rabu naara pirali. Go yapare ne aipapulu rekoa kogono pali-dare nena maapu-para eta oyae adaapu sali.

¹⁴Aa meda oyae kabolalo pea pare mo yaena yoto ora adaa pea rabu nipumi agaa adaapu ta. Mo yae aba kaboria pua nipuna adami aanu-para gupa pua ta. Go yaere mone ogesi pe yae meda kaboa mea ipulu ta.

¹⁵Epe kone imi onaana agaa teme raburi pa aa medalomana golo rabuaeme.

¹⁶Gore aa medana yago nipumi pa aa medana rudu abulalua agaa loa yapare wala na-abuteadaare waea pea. Gore nipumi epea go napea-daa. Gore aa-me go piaene agaa meda teadare neme oyae meda mo rudu abune nona pina ora meape.

¹⁷Yaa agaa loa mua ne etanuri rede pi eta meda kone i pare oropere go paake ne etare wae yae yana kone sali. Go mea ne etare nena agaa peto-para ipa mu-rupa kilulu tea.