Ol Provep 19:5-19

⁵Gore aa medame yaa agaa loa koso teare nipumi wae yoto mealia. Goa palia rabu nipu mada napogla palia.

⁶Gore aa adaapumi aa mudu pimi aanu omeme waru peme. Goa pua nipumi nimu raana omenalo. Oyae pama kane aanu raana omoa go aa nipuna adami aa kone imi.

⁷Gore aa medaa nipu oyae diayalia rabu nipuna amenume page go aa gimeme. Goa peme rabu nipuna adami aanumi page mo aa maasa rilaawa gimeme. Nipu repara omeme-pi agaa-ta pare nipuna agaa ini namadini pa rasatapa ia.

⁸Aame nipuna bipa epe-rupa piralua kone suare epe pora-para makuae yae mulalo puri waru paloa epe kone meape madaa kogono palia. Aame makuae yae mua epe konena pora rataliare nipuna epe-rupa pirape yae mua epe-rupa piralia.

⁹Go yapare aa medame koso loa yaa agaa tea-daare nipuna tea yaa agaa mada wae yoto ora mealia. Go piaene yaa agaa ne aare tumaomalimi.

¹⁰Epe kone na-ia aa nipumi mone oyaenu adaapu su aayare na-epeta. Naara piri kogono naakimi mo aa mudu wala surubea page ora rado yade.

¹¹Epe kone i aa nipumi kone gupa ia. Nipu epe kone ia-pulu ratu ratu yawape kone aipapulu naia. Goa pua aa medame nipu-para waea pea page gimea.

¹²Gore mena kiraa-me e waru loa aa mudu king pia aa ratu waru yawea. Go yapare ratu yawe onaa rabamulalo paliare yai ipua maapu-para eta naape yae ma-opaaya-rupa mada palia.

¹³Naaki meda nipu epe kone nasaliare go naakimi nipuna aaraa kedaa waru mea kata. Gore aa medana oreme ratu yawoa agaa adaapu loaliare nipuna ada runane itipata pabea-rupa tea.

¹⁴Niaana aama aapanumi mone oyaenu rumaa gialimi pare Gote nipumi epe kone i ona mea gialia.

¹⁵Kiaa rakepene aanu nimu oro yalo pama piruaawa reaeme omoa u keme waru loa patala pu aaeme.

¹⁶Aame Gote-na pora ratua epe-rupa pitiare naoyalia pare nipu ora epe-rupa piralia. Go yapare aame Gote-na epe kone madaa masa rilaawa waea-nu paliare nipu omalia.

¹⁷Gore neme aa naara meda odome-omoa oyae katalo pali-daare mo Adaa Aame ne madaa rudu ainalo pe. Goa pali-daare orope Adaa Aa-me nena rudu go abutea.

¹⁸Gore nena naakimi waea pua pupitagi naliare neme nena naaki mana lape. Mana te raburi nipumi epe pora ratalia. Go yapare neme mana lake pupitagi pa nalaaina gimaliri gore nena naaki riaa omenawa kone sua pe.

¹⁹Gore aa medame rono omoa nipumi waea paliare nipuna go wae yaena yoto mulalo pea. Go yapare neme nipu rabamua nipuna kedaa mea riali-dare wala orope page nipu rabameaina kone agu sua palia.