Ol Provep 14:11-33

¹¹Wae aa nipuna ruru ona nogo naaki luabu ora oyoa luabu dia yalimi. Go yapare mo epe redepone aa-na ruru ora puri waru mua nimu ora epe ruru piralimi.

¹²Aa medalomame gupa kone imi: Nimuna pema yae rayo epe ta kone sua peme. Go yapare nimumi pama pama pua omalimi.

¹³Niaame giri lo aalima page wae lo robaa kedaa niaa mada nagimalia. Raana omo pirape yapi-di rabu page lo robaa kedaa ora mada na-dia yalia.

¹⁴Wae aanu nimuna peme wae yae madaa ini noa raana waru omeme. Go yapare epea peme aanu nimu pedo raana waru peme.

¹⁵Aanu nimu makuae yae ogesi i aanumi agaa ia-rupa luabu kone waru rulaeme. Goa pea pare kone epe-rupa ia aame nipuna lape agaa rayo waru kone makuaawa ta.

¹⁶Epe kone i aa nipumi nipuna kone waru suruboa nipu madaa wae yae ora naepena kone ia. Wae aame re oyae rayo pa epeta kione sua rayo pa palua kone sua pa pama pea. Nipu wae aa yade kone page na-ia.

¹⁷Ratu yawe aanumi maeyawa ratu ora aipapulu yaweme. Onaa luabumi aa meda oro yalo nipuna raana ratuaaya madaare gimi omeme.

¹⁸Aa medaloma ogesi makuawa nimu mo maeyae aanuna kone rateme. Go yapare epe aanu nimuna makuae yaere nimuna alu-para epe pepena peme raguname adea. Go aa nipuna ia kone-re epe aaluna pepena yade.

¹⁹Wae pupitagi aanu nimu mo epe aanu pitimi-para pirua nimu rabamu eta epe yaenu kanalo agaa lo piralimi. Nimu odome omena kone sua pitimi.

²⁰Aa medaloma oyae rudu teme adape-re gime omeme. Nimuna aapa ame yalia page ora gimeme. Amone aanu nimuna adami aanu adaapu aawaeme.

²¹Aa medame aa yago meda naara mapiralia-re go aa nipu maeyawa naarame pama pea. Go yapare aa medame oyae ruduta aanu madaa odome omoa titi omalia-daare go aa nipu epe raana mealia.

²²Aanumi wae yae oro yalo pumuna kone sua pualimiri nimuna kone ota. Go yapare aa medame epea peme mada rana omoa onaame epe pora ratina kone salia-dare epe kone go aa waru kata.

²³Neme kogono waru radaa pina pali-dare ne ora epe yoto meali. Go yapare ne pa pirua agaa wariba pirali-dare ne wae naarame omali.

²⁴Epe kone ia aa-na konere nimuna mone yade. Go yapare aa medaloma epe kone na-imire nimu maeyae kone agu su aaeme.

²⁵Gore aa medame koso raba mu agaa epe-rupa teare mo kosome aa tumaomaarina-re waea pana tea. Go yapare mo koso raba meape agaa epe-rupa nateare go aa nipu makira agaa ne aa.

²⁶Aa meda nipu Adaa Aa-na agaa ratua kumapi-rupa piraliare nipu oyae meda palame na-omalia. Goa pua nipuna nogo naakinu page nimu luabu epe-rupa piralimi.

²⁷Adaa Aa-na agaa pagoa nipu ratapena konere ipa laipi kagaa piraama lama popena re yade. Go kone i aanu madaa wae yaenu naepalia. Go pua mo wae yaenu epolalo palia page mada mapakealia.

²⁸Aa mudu king medame onaanu adaapu surubaliare nipu adaa bi mea kateme. Go yapare mo aa mudu king nipumi onaa ogepusi surubalia raburi nipu adaa bi nasalia.

²⁹Aa meda nipu ratu aipapulu nayaweare go aa nipu ora epe kone waru ia. Go yapare ratu yawe aa maeyae kone ora epe ta kone ia.

³⁰Aa meda nipu pu robaa kumapu pawa ina pirualiare nipuna to yogaene page epealia. Go yapare aa meda nipumi wae agaa loa oro yalo oyae epame omape kone sualiare wae yaina go aa nipu madaa pupua nipuna uni luabu mada maopaya.

³¹Gote nipumi onaa raayo warisa-pulu aa medame go aa nere ora aa naare wae te-dare neme Gote page wae gote yade te. Go yapare Gote adaa bi katere naaranu page epea pali.

³²Wae aanu nimuri nimuna peme wae yaenumi nimu maoyaeme. Goa peme pare epe-rupa pimi aanu nimuri oyae meda page ake palua pae kone na-i epe rupa aeme. Nimu madaa omape yaeme mealia rabu page kone rulae yae mada puri paboa aalimi.

³³Kone epe waru na-imi aanu nimuna bipa aba makuaeme. Makuae yae-para epe kone lapore nimumi minalo suruba pia pare nameme. Go yapare epe kone imi aanu nimuna minalo epe kone epe pora ratua oro yalo muaeme.