Numperis 15:3-28

³“Oupwe eäni asor ngeni ewe Samol mi Lapalap eman ätemwänin kow, ika eman ätemwänin sip, ika kuuch, pwe ämi soren kek ika sokun asoren pwon, ika asor seni püsin letipemi, ika asor lupwen fansoun ekewe chulap mi kefilitä, pwe eu asor ewe Samol mi Lapalap a efich pwoon.

⁴Iwe, ewe aramas mi uwato an asor epwe pwal eäni asoren mongö ngeni ewe Samol mi Lapalap ruu paun pilawa mi amas o mürina nofitfengen me eu kuoch apüra.

⁵Epwe pwal eäni asoren ün eu kuoch wain o achu ngeni eman me eman lam fän iten asoren kek ika sokun asor.

⁶Iwe, are epwe eäni asor eman ätemwänin sip, epwe achu ngeni rüanü paun pilawa mi amas o mürina nofitfengen me eu esop kuoch apüra pwe eu asoren mongö.

⁷Nge fän iten asoren ün epwe eäni asor eu esop kuoch wain pwe eu asor ewe Samol mi Lapalap a efich pwoon.

⁸Iwe, lupwen ewe aramas epwe eäni asor ngeni ewe Samol mi Lapalap eman ätemwänin kow fän iten asoren kek ika sokun asoren pwon ika asoren kinamwe,

⁹epwe achu ngeni ewe ätemwänin kow wonu paun pilawa mi amas o mürina nofitfengen me esop kalon apüra, pwe eu asoren mongö.

¹⁰Epwe pwal eäni asoren ün esop kalon wain pwe eu asor ewe Samol mi Lapalap a efich pwoon.

¹¹Iei usun oupwe föri fän iten iteiten eman me eman ätemwänin kow ika ätemwänin sip, fän iten iteiten eman me eman ätemwänin lam ika apanen kuuch.

¹²Ükükün iteiten ekewe mönün asor oupwe eäni asor, epwe pwal ina ükükün mine oupwe achu ngeniir.

¹³Iwe, chon Israel meinisin, ir chon wilipos repwe föri pwüngün ekei lapalap, lupwen repwe asor ngeni ewe Samol mi Lapalap, pwe i epwe efich pwoon.

¹⁴Nge are eman chon ekis mi siamüfetal remi, ika eman chon ekis mi nonom leimi seni eu täppin aramas tori eu täppin, a mochen eäni eu asor ngeni ewe Samol mi Lapalap, i a efich pwoon, epwe föri pwüngün mine oua föri.

¹⁵Iwe, epwe chök wor eu allük fän itemi me fän iten ekewe chon ekis mi nom remi. Ei epwe eu allük tori feilfeilachök seni eu täppin aramas tori eu täppin. Ämi me ekewe chon ekis oua wewe chök me fän mesen ewe Samol mi Lapalap.

¹⁶Iwe, epwe fokun wor eu chök allük me pwüng fän itemi me fän iten ekewe chon ekis mi nom remi.”

¹⁷Iwe, ewe Samol mi Lapalap a ngeni Moses

¹⁸pwal ekoch allük usun asor fän iten ekewe aramasen Israel, pwe repwe apwönüetä me lon ewe fanü i epwe emwenirelong lon:

¹⁹“Lupwen oupwe eni mongön ewe fanü, oupwe aimwüela eu kinikin seni, pwe eu asor ngeni ewe Samol mi Lapalap.

²⁰Lupwen oua umuni pilawa, ewe efochun mwen öüwämi pilawa seni föün wiich mi fö oupwe eäni asor ngeni ewe Samol mi Lapalap usun chök ekewe föün wiich oua eäni asor seni ewe lenien wichiwich umwun wiich.

²¹Oupwe eäni asor ngeni ewe Samol mi Lapalap eföü pilawa seni mwen öüwämi pilawa. Ei allük epwe fän itemi seni eu täppin aramas tori eu täppin.

²²Ewe Samol mi Lapalap a ngenikemi ekei allük meinisin Moses a aiti ngenikemi. Are oua atai eu lein ekei allük, nge sap ren mochenin letipemi,

²³ika mwirimwirimi kana ra pwal atai,

²⁴nge ewe mwichen aramas esap mefi pwe a mwäl, ikei mine oupwe föri: Unusen ewe mwichen aramas epwe eäni asor eman nienifön ätemwänin kow fän iten asoren kek ewe Samol mi Lapalap a efich pwoon. Repwe achu ngeni ewe asoren mongö me asoren ün usun mine a pwüng. Repwe pwal eäni asor eman ätemwänin kuuch fän iten asoren tipis.

²⁵Iwe, ewe souasor epwe föri asoren amusamusen tipis fän iten unusen ewe mwichen chon Israel. Ar föför mi mwäl epwe musala, pun esap fis seni mochenin letiper, ra pwal uwato ar asoren kek ewe Samol mi Lapalap a efich pwoon, me ar asoren tipis.

²⁶Iwe, unusen ewe mwichen chon Israel me ekewe chon ekis mi nom leir epwe musala ar mwäl, pun iteiter meinisin ra pachelong lon ewe föför mi mwäl esap fis ren mochenin letiper.

²⁷Iwe, are eman aramas a tipisin chechengau, epwe eäni asor eman liefefinin kuuch eu ierin fän iten asoren tipis.

²⁸Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi föri och mwäl, lupwen a tipisin chechengau. Iwe, epwe musala an tipis.