Niqiqoosa 1:3-12

³Yísufa narí kúqiranakiqari fíndifinoo miqóoqari qaara fasiqa níku nísauku taikásee faasaana máridanoo narí faiqi námu máruqoo moómoo kari kooroomámbinoo misá faqa ufa qídanoo Ánutuna innaarúna ququsakinaa máriranara ufa qímannimimarinau. Miqímandeenoo narí kúqiranakiqari fíndifinoo akooqóo máriranara uqannífiqanau.

⁴Mi-fasannái mi-kamúqoo miná faiqi námu miná ufa írimarusa moodáanaki suqúfufanoo Yísufa misá faqa máridanoo maaqí qímasee ufa qímanniminau. Qinée innaarúnai óoru fúanaqa ínnee maa-maqusána Yeerusaree máqusa sía quqásee fífainiaqa káqi maríaqa. Qiní qíkoofa moó afeeka nímianinnanara qinée qímannimiafannana minára maaqóo kai márida rakísiaqa.

⁵Yoohaneefa nammári rúmannimaqee márifa káqi fífau nammari uqannaki moómoosa rúmannimaqee marínau. Ánutufa qúsasaa ánoona ainainaki narí náaquqara andeeqara máraqunnaki ínni rúmannimaqaannoo.

⁶Yísuna afaaqasáa áqoondiuqa miná faqa nímarusa misára niqiqoo fásiqausee qímariqau. (Yísufa máru aukuanna Roomma máqannaa kaamánna faqa sundíauqa faqa rakísinnimaqee márufanoo Yuda máqannaasa níkooqanau. Náqimásee Roomma máqannaa niqiqámásee fee maasá qeeqá rakísianáuree qímariqau.) Minára Yísuna afaaqasáa aqoondiuqa Yísuna faqa suqúfiqa irámmiriqa qiqau. Óo Karaambáiqa maa-aukuannée yáiree fee anée Roomma máqannaa kaamánna aqiqámáseenee Isaraee máqannaa maasá nári kaamánna quqéennaree.

⁷Yísufa mi-ufána iriséenoo qímanniminoo qinau. Óosana óosana ainaina náaru kambíqaaninna aukuannai sía ínnindifau máridanoo. Qiní qíkoofa narí afeeka rakísirana quqáseenoo, sía ínniara íriaqee qinau.

⁸Maanára kai íriaqee qinau, qiní qíkoona náaquqara andeeqara maraquna fannoo qumurée ínni náakufinaqa ínnee qiní qíqafara fasiqauqa qiníara aiqámai qímannimímarée fifáranoo Yeerusaree máqusaki máriasa faqa Yudeeaa máqa maaqaki máriasaki faqa Samaria máqa maaqaki máriasaki faqa níanai aiqáma atinnai máriasaki faqa qiní qíqafara fasiqauqa qiníara kooroo ífaranoo.

⁹Yísufa miqí qímaseenoo misá nífusaa miqóoqari Ánutufa kukéeqaranakiqari Yísuna akooqóo uqéerasoofanoo innaarúnai óorufimarufanoo asuru fannoo qumu dukúnimaseenoo misá nífusaa kai qumu áfiqee óoru fínau.

¹⁰Misá miqóokai tatáaqa márufanoo qaara fasiqa éekara qamunna afisíraqanda miqóo misáki dadí fíndifufaqaqára kikíqiqau.

¹¹Miqandá maaqí qímasee aiqámausa qímannimiqau. Óo Kariree máqannaasa Ínnee nánaree innaarúnai nóori uqéerasee tatáaqa máridee, ínnee fífau miqí maríafanoo. Ánutufa Yísuna maqee ínni nífusaa uqéereeqeenoo innaarúnai múru quqéenoo dóo Yísufa maqee innaarúnai óoru fíndee kai miqíkai ínoo kásooqaqee kafáa qúmuannoo.

¹²Miqandá miqí qímasoofaqa Yísuna faiqi námu quqásee Oorifa áaqanasaaqari Yeerusaree máqusai kafáa óoqu kéeqaqau. Oorifa áaqana sía níanai máridanoo. (Moodáa kirometera maaqíraqoo máridanoo dínni Qufoórai miqíraqoo Yeerusaree máqusa máridanoo.)