Ninaedi rina Tinoni 23:7-28

⁷Zama vura nia Belami sa kinorokorotae hie: “Na turaṉa mae nau e Balaki sa baṉara pa Moabi, meke mae gua koari na toqere pa Siria pa kali gasa rimata si rau. Meke zama si asa, ‘Mae, mamu leve nia sa butubutu te Zekopi, gua, mamu zama ṉoṉovali sari na tinoni Izireli,’ gua.

⁸Meke nanasa si rau: Na vegua ke kaqu boka leveni tu rau saripu lopu leveni e Zihova? Meke na vegua ke kaqu boka zutui tu rau saripu lopu zutui e Zihova?

⁹Koa pa batu patu pa toqere, meke doṉo gore lani rau, koa panaulu, meke kopu totokoni rau si arini. Na butubutu koa vata kaledi si arini, meke gilania rini sapu na butubutu tamanaedi holani sari votiki butubutu.

¹⁰Loke tie boka naei sari na sinokudi ri na tinoni te Zekopi, na soku gua tugo na kavuru pa pepeso si arini. Ke maqu va hokotia mo sa qua tinoa guari na tinoni te Tamasa, maqu mate qua pa binule guari na tie toṉoto.”

¹¹Meke zama la koe Belami se Balaki, “Nasa si tavetia goi koa rau? Ura ele turaṉa mae nigo rau pude leveni sari na qua kana, ba loketoṉa si tavetia goi, ba manani tu goi si arini,” gua si asa.

¹²Meke olaṉa si asa, “Kaqu zama nia mo rau sapu gua tozi nau e Zihova pude zama nia,” gua.

¹³Beto asa si zama la koe Belami se Balaki, “Mae luliau, mada la pa keke vasina sapu kote boka dogori goi sari kaiqa tie Izireli. Mamu leve maeni mo vasina.”

¹⁴Ke turaṉa la nia sa koasa inuma Zopimi pa batuna sa toqere Pisiqa si asa. Meke vasina si taveti sa si ka zuapa hope, meke va vukivukihi nia sa si keke bulumakao kokoreo meke keke sipi kokoreo, koa ri ka zuapa hope.

¹⁵Meke zama la koe Balaki se Belami, “Turu kapae koari na mua vina vukivukihi va uququ, maqu la tutuvia sa Tamasa panahoi,” gua si asa.

¹⁶Meke mae tutuvia e Zihova se Belami, meke tozi nia sapu gua kote zama nia sa, meke garunu pule la nia Sa koe Balaki pude tozi nia koasa sa inavoso.

¹⁷Ke pule la dogoria sa se Balaki korapa turu kapae nana koari nana vina vukivukihi, somanae koari na koimata tadi na tinoni Moabi. Meke nanasa nia Balaki sapu gua zama nia e Zihova koasa.

¹⁸Meke zama vura nia e Belami sa kinorokorotae hie: “Balaki, tuna e Zipora, mae mamu avosia sapu gua kote zama nia rau.

¹⁹Sa Tamasa si lopu kekeṉoṉo guana tie sapu hoke kokoha. Lopu guana tie toana si Asa sapu hoke hobehobea Sa sa Nana binalabala. Gua sapu va tatara nia Sa si kaqu va gorevura ia tugo Sa, Gua sapu zama nia Sa si kaqu tavetia tugo Sa.

²⁰Ele garunau Sa pude manani si arini. Ele tamanae koe Tamasa si arini, ke lopu kaqu boka hobea rau si asa.

²¹Loke minalaṉa babe na tinasuna si kaqu ta evaṉa koari na tinoni Izireli. E Zihova sa dia Tamasa si korapa koa koa rini, meke korapa zama vura nia rini sapu Asa tugo sa dia Baṉara.

²²Ele turaṉa vurani Tamasa pa popoa Izipi si arini, meke ṉiṉira guana bulumakao pinomona si arini.

²³Loke tinavete potana, meke loke ṉiniraṉira potana sapu boka va kilasia sa butubutu Izireli. Ura kote zamani rina tinoni sari na butubutu Izireli, ‘Dotu, dogoria goi sapu gua ele tavetia Tamasa koarini!’ gua

²⁴Sari na tinoni Izireli si ṉiṉira gua tugo na laione, meke hoke gasa tekulu guana laione si arini, meke lopu hoke eko magogoso osolae gani betoa sa sa nana boso meke napoi sa eharadi sarini pu va matei sa,” gua si asa.

²⁵Beto asa si zama la se Balaki koe Belami, “Ego, be koromu leveni goi si mu lopu manani tugo.”

²⁶Ba olaṉa se Belami, “Vegua, lopu ele tozi nigo tu rau, sapu sari doduru gua pu zamani e Zihova si kaqu taveti tugo rau?”

²⁷Beto asa si zama la koe Belami se Balaki, “Leana mae, maqu turaṉa lanigo pule pa keke vasina. Meke hokara vasina si kote qetu sa Tamasa meke boka va malumigo Sa pude leve maeni vasina si arini.”

²⁸Ke turaṉa sage la nia Balaki se Belami pa batuna sa toqere Peoro, sapu doṉo gore la gua koasa popoa qega.