Nabasi 23:7-28

⁷Areme Berame fune uri vua fuone ije ijiege kuae, Beraki e Moabaetiko ijiebuo kini ije fu aesakae Siria uruo ije mazani ajiamo nake ijia mesiriena una igia ruae. Areme fu kie, Ni e Jekafudo uifari ije kuravajia areme vua ma ise bino e Isureroko ije buesina kuaeno kie.

⁸Rove na izege uri e ije Godi fu naebe kuravajiakiro vierafema ije kuravajiake? Ro kuke na izege e ije Godi fu naebe vua ise bino buesina kuaekiro vierafema ije buesina vua ise kuaeke.

⁹Na nafare kubi ije mune ijiaru ireva ijia mani nesena bu giae. Ro bu ije na giaga buka turaekisana buebe irigi kafaena karinoeve. Ro kuke buka e ma uruvana rove bu e aesakae gue arafiriavo baki.

¹⁰Ro erare e Jekafudo uifari ije ka ma uruvana davare ajare igege zaraema ije dake? Ro kuke erare e Isureroko ijiebuo uifari ije bu rade tuanavo ije dake? Ro na vierafe naka e maturaeva bu oevo na buenina ijiege baronekiro vierafevano kuae.

¹¹Fu ijiege kuaemoga Kini Beraki fu fiena uri kuae, A vua ije a irere kuaeme? Na a na mesira ruaeva ije a e Isureroko e ani none ije kuravajiakiro na ijadufuo mesirana ruae. Rove a naebe kuravajia ro aka una bu daro miaemano kuae.

¹²Fu ijiege kuaramoga Berame fu kuae, Na vua bino nabe none vierafeva ijia kuaeke. Ro name vua irere E Ireobo fu kuariema na ijiaru kuaekono kuae.

¹³Areme Kini Beraki fune uri Berame kuae, Ni roga no una are be ijia vaga a noefuo ijia manina e Isureroko ije akaeguekinu giana kuravajiano kuae.

¹⁴Beraki fu ijiege kuara areme fune Berame mesirina are Zofimi uruo Fisiga kubi ijia vae. Bune va ijia usiae areme Beraki fune uri fata zinone ifaejedufuo seveni (7) ijiege amaeriae. Areme fune mave-kau kumate besu ro sifi kumate besu ijiege maziena fata besubesu ijia zinone ifaejevano kuae.

¹⁵Areme Berame fune Kini Beraki kuae, Ani zinone one ige no ifaejeva ijia manike na gafia va E Ireobo ije bieno kuae.

¹⁶Areme fune ijia vakoga E Ireobo fu ari ijia biena vua kuarae. Areme fu uri kuae, Nine una va Beraki vua ige na kuaravo ige kuarano kuae.

¹⁷Ijadufuo fune una va gake Beraki fu e Moabaetiko ijiebuo e mamekanu ijena zinone fuone bu ifaejeva irifo ijia manine. Fu ijia maninoga Berame fu romoga fu kuae, E Ireobo fu vua izege kuaraemano kuae?

¹⁸Fu ijiege kuamoga Berame fune uri vua ijiege kuae, Beraki e Zifodo fari gure vua ige na kuaravo ije mukoreigia fiene.

¹⁹Godi fuje fu ema bakido fube vua kufuimeke. Ro kuke fu emabuo fari baki ijadufuo vua irere fu rekiro kuaemo ije fu aremo bakiro fuka reko fu riaremo.

²⁰Ro naeje fune fure daro miena kiemo na daro miaedo na izege arekuva baki.

²¹Na gaga e Isureroko bu rade ise bino biediakuvejo baki. Ro Godi E Ireobo buone ije fuka buina oenoeno ro fuje bu kua fu Kini buoneno kuavo.

²²Fune Godire korufuo are Ijifiti ijia kaenamiana keke ruaema ijadufuo fune fure korufuo mave-kau kumate baego igege buefuo bijaemo.

²³Ro fu erare e Isureroko ije kuravajiana kame isekafiakuma baki. Ro e bu ije giavo bu kuaeko, Kame Godire vame maeje e Isureroko ijiebuo remo ije gano kuaeke.

²⁴Ro e Isureroko ije buka fanu raejoni ije fu vasia oega fu fanu gue sakiana buvua ikiro samua namo igeki. Fu samuana fi vakuma fanu be gakuma fu sakina i furikono kuae.

²⁵Berame fu ijiege kuaemoga Beraki fu kuae, Ro a vierafega e ije a naebe kuravajiavoga ni e ije a daro miamo ije ijareno kuae.

²⁶Rove Berame fu una kuae, Na aeje nane kuarae. Na kua na ire boeje naka irere E Ireobo fu vierafema na ijiaru rekono kuae.

²⁷Kini Beraki fu Berame kuae, Ni roga na mesirana una are be ijia vane. Na vierafe no ijia vakuva Godi fu bite are ijia oemarega a e ije noefuo kuravajiakono kuae.

²⁸Ijadufuo Beraki fune Berame mesirina uruo Fio kubi ijia vakoga fu ijia mani nesena ae sao ije rere.