Ni Gi 15:27-41

²⁷“Bara bakovi tara i rata ruru a naro hale, ra bakovi iea ge habia a meme ge taku a kinana i tahoka a pida i taku, ge a nihabi na naro hale.

²⁸Na matane BAKOVI DAGI, a prister ge habia a sipsip ge kavitagua a viri i rata ruru a naro hale. Na tahuna ni kavitagu a bakovi iea, a naro hale vona bara ni puga vuroki.

²⁹Na tahuna a Israel tara o a mosi tara i rata ruru a naro hale, a vinara ge ramaia ge taku kunana.

³⁰Pali a viri i longotaro a nitagu i rata a naro hale, i manga i harogi iau. Ra bakovi iea ni gi rabalaki. Naha ni varoru vona ge ia a tahotanga o ge ia a mosi,

³¹a vuhuna ra bakovi iea i longotaro a nitagu. Na ningaru vona kunana i putu purua tara vinara nau. Mu rabalakia ra bakovi iea, a vuhuna i tahoka a ngava.”

³²Na tahuna e huriki a Israel ri tabana na tabeke i ngeki, ri masia a bakovi i popo a kai na Parava Nimalo.

³³Lakea ri tuli lakea na matane Moses e Aron, ne huriki lobo a Israel.

³⁴Ri ru dili taroa na bavi, a vuhuna i uka ma ri lohoka vona a ra maki ri gi ratea vona.

³⁵Lakea e BAKOVI DAGI i takia e Moses i ta maea, “Mua e huriki a Israel mu rabalakia ra bakovi iea na kedo polovavo na mada.”

³⁶Lakea e huriki a bakovi a ngatavine ri longototo a nitane BAKOVI DAGI, ri tuli talea na mada ri padimatea na kedo.

³⁷E BAKOVI DAGI i takia e Moses,

³⁸ge taki e huriki a Israel ge ta maea, “Mu bole a hotu mu rata a maka potu, mu varomu na nimodo na varakia ne mua. Na potu takutaku mu varomua a hotu gomagoma ge taku. Mua turane huriki a hamone mua ri gi bele muri ma, mu ramaia ra vinara iea.

³⁹Na tahuna mu matai a maka potu nga, bara mu luhoi a maka vinara lobo a habi ne mua, mu ramai. Lakea i uka ma mu gu pe iau, mu gu ramai a ningaru ne mua kunana mu gu rata a naro hale.

⁴⁰Ra potu nga bara ri rata mua, mu gu ramai a maka vinara nau bara mu made kamumu ge mua e huriki a tara nau.

⁴¹Iau e BAKOVI DAGI, a Vure ne mua, a bole tala mua o Egipto, ge iau a Vure ne mua. Iau e BAKOVI DAGI a Vure ne mua, a ta pali.”