Ngën-gi-woy 5:3-15

³Ma ne ko: «Summiku naa de, xanaa duma soluwaat? Jàngu naa jeeg, xanaa duma taqati?»

⁴Sama nijaay yoor loxoom ci xarante bi, sama yaram ne sàyy.

⁵Ma ne bërét, di ubbil nijaay, sama yoxo yi, diwu ndàbb di ca siit, sama waaraam yi, ndàbb rogalaat ba ci njàppul bunt bi.

⁶Maa ubbil nijaay, waaye nijaay waññiku na, ba wéy. Ba mu waññikoo, tuuti ma dee. Seet naa ko, gisuma ko; ma woo ko, wuyuwul.

⁷Wattukat yiy wër dëkk bi gis ma; ñu dóor ma, gaañ ma, ñori sama malaan. Wattukati tata jaa!

⁸Ngalla yeen, janqi Yerusalem, waatal-leen ma ne su ngeen gisee sama nijaay, ne ko damaa wopp ndax mbëggeel.

⁹Yaw mi dàq ci jigéen ñi, ana lu sa nijaay gëne keneen? Ana lu mu ëpplee keneen, ba nga di nu waatloo lii?

¹⁰Sama nijaay daa xees, leer; kenn la ci fukki junniy góor.

¹¹Kanam gi ni wurus, di wurusu ngalam; njañ li lëmësu, ñuul ni ndobin.

¹²Gët yi ni pitax yu feggook wali ndox, sangoo meew, feggook ndox mu ne xéew.

¹³Lex ya di tool, gàncax ga ne ca bann, tuñ ya diy tóor-tóor, ndàbb wale ca, rogalaat.

¹⁴Yoxo yi banti wurus la, ngën-gi-per tappe ca; jëmm ja rattax ni bëñu ñay laloo peri safiir;

¹⁵yeel yi kenuy doj wu jafe la, sampe ci tànki wurusu ngalam. Meloom ni tundi Libaŋ, di tànnéef ni garabi seedar.