Ngën-gi-woy 1:3-12

³Sa diw yi ngay xeeñoo neex, saw tur jib, mel ni lu xeeñ a xelli. Moo tax janq ji nob la.

⁴Yóbbaale ma, nu daw, dem. Sama buur, yóbbu ma sa néeg, nu bokk mbég ak bànneex, di tàqamtikoo sa cofeel gi dàq biiñ. Ñoo yey nob la!

⁵Yeen janqi Yerusalem, damaa ñuul, rafet; ñuul ni xayma ya ca Kedar, mel ni ridoy Buur Suleymaan.

⁶Buleen ma xoole sama ñuulaay bi, jant bee ma lakk. Samay càmmiñ a ma mere, di ma wattuloo tóokëri reseñ ya, te wattuwuma sama tóokëri bopp.

⁷Sama soppey xol, ngalla wax ma ana fooy foral, di fa gooral, digg bëccëg? Lu ko moy may muuru, di la wër fi say xarit ak seeni gétt.

⁸Aa! Xamoo koo? Yaw mi dàq ci jigéen ñi! Génnal rekk, topp wewi jur gi, sàmmi say tef, fi dendeek mbaari sàmm si.

⁹Xarit, xam nga lu ma lay xoole? Yànjaayu wajan wu takk watiiru Firawna.

¹⁰Sa lex yaa ngi tàkk fi digg sàdd yi! Céy wii loos ak caqu peram!

¹¹Sàddi wurus lanu lay defaral, tapp ca xaalis.

¹²Li sama buur tëdd, di xéewlu lépp, maa ngi gilli lu neex.