NARONAA 24:12-24

¹²Balamu pìnɛ: Mádi o gbɛ̃ kũ n ń zĩmanↄnɛroo!

¹³Ma pì bee tó n ma gba n bɛ kũ à pana kũ andurufuuo kũ wuraao, mani bo Dikiri yã kpɛ mà yã kɛ kũ ma zĩda pↄyeinaaoro, a mana ke a vãni. Yã kũ Dikiri pì mà on mani o.

¹⁴Matɛn tá ma gbɛ̃nↄ kĩnaa sà. Ǹ mↄ́ mà onnɛ lákũ gbɛ̃ pìnↄ ni kɛ n gbɛ̃nↄnɛ nà zia.

¹⁵Akũ Balamu yã kũ à èe ò à pì: Bɛↄ nɛ́ Balamu yãn dí, makũ kũ ma wɛ́ kɛ̃na yãn dí.

¹⁶Makũ kũ madì Luda yã ma yãn dí. Má Luda Musude nɛ̀sɛgũnyã dↄ̃. Ma Gbãnasĩndapinkide wɛ́gupu è, ma wutɛ nɛ̀sɛlɛ kutɛna, ma wɛ́ wɛ̃na.

¹⁷Matɛn Isarailanↄ e, adi kɛ teranlo, matɛni ń gwa, a gↄrↄ dí ká gĩaro. Susunɛ ni bo Yakubu burinↄ tɛ́, kpatableri ni bo Isarailanↄ tɛ́, ani Mↄabunↄ mì wíwi, ani zukakari pìnↄ mìtoko fↄ̃fↄ̃.

¹⁸Ɛdↄmu bùsu ni gↄ̃ a pↄ́ ũ, a ibɛrɛ Sei bùsu ni gↄ̃ a pↄ́ ũ, Isarailanↄ gbãna nigↄ̃ karamɛ.

¹⁹Yakubu buri ke ni kí bleḿma, ani gbɛ̃ kpara kũ ò gↄ̃̀nↄ kakatɛ.

²⁰Balamu Amalɛki burinↄ è, akũ à yã kũ à èe ò à pì: Amalɛki burinↄ bi burinↄ mìdemɛ, ama oni kakatɛ zã.

²¹Kũ Balamu Keninↄ è, akũ à yã kũ à èe ò à pì: Á kúki gbãna gíngin, á sà kú gbɛ̀ musu.

²²Bee kũ abireo oni á kakatɛmɛ, Asirianↄ ni á kũkũ zĩ̀zↄnↄ ũ.

²³Balamu yã kũ à èe ò dↄ à pì: O'o, tó Luda kɛ̀ lɛ, dí mɛ́ ani boo?

²⁴Gó'itɛnↄ ni bo Sipiru bùsun, oni zĩ̀ ble Asirianↄ kũ Eberunↄa, ama mↄ́kↄ̃nↄ ni kakatɛmɛ se.