4Kũ ò fùtɛ Oru kpi pì kĩnaa, ò Isira Tɛ̃ra zɛ́ sɛ̀ de ò pã Ɛdↄmunↄ bùsuunɛ. Akũ ò fù mɛnaa zɛ́n
5ò Luda kũ Musao taari è ò pì: Bↄ́yãi a ó bↄ́tɛ Misila de ò gaga gbárannann? Pↄ́ble kunlo, í kunlo, o zã pↄ́ble gina dín.
6Akũ Dikiri mlɛ̃̀ pãsĩnↄ zĩ̀ḿma ò ń lɛlɛ, akũ ò gàga dasidasi.
7Gbɛ̃nↄ sù Musa kĩnaa ò pì: O durunna kɛ̀, zaakũ o Dikiri kũ mↄkↄ̃nwoo taari è. Ǹ kútɛ kɛnɛwɛrɛ de à ó kɛ̃kↄ̃a kũ mlɛ̃̀ dínↄ. Akũ à kútɛ kɛ̀nɛńnɛ.
8Dikiri pìnɛ: Ǹ mlɛ̃̀ pi ǹ loko lía ǹ pɛ́tɛ. Tó mlɛ̃̀ gbɛ̃ lɛ̀, tó à wɛ́ sɛ̀ à a gwà, ani aafia le.
9Akũ à mↄ̀gotɛ̃ pì mlɛ̃̀ ũ à lòko lía à pɛ̀tɛ. Tó mlɛ̃̀ gbɛ̃ lɛ̀ akũsↄ̃ à wɛ́ sɛ̀ à mↄ̀gotɛ̃ mlɛ̃̀ɛ pìi gwà, àdi aafia le.
10Isarailanↄ dà zɛ́n, akũ ò bùraa kàtɛ Obo.
11Bona Obo ò gɛ̀ɛ ò bùraa kàtɛ Iyɛ'abarimu gbárannan Mↄabunↄ bùsu ifãboki kpa.
12Bona gwe ò gɛ̀ɛ ò bùraa kàtɛ Zeredi guvutɛn.
13Bona gwe ò bùraa kàtɛ Anↄ bara dire, gbáranna kũ à kú Amↄrinↄ bùsu lɛ́zɛkin. Anↄ pìmɛ Mↄabunↄ kũ Amↄrinↄ bùsunↄ lɛ́zɛki ũ.
14Abire yãin ò pì Dikiri zĩ̀katakada gũn: Waɛbu kũ à kú Sufa bùsun kũ Anↄ swa'ↄnɛnↄ
15kũ ń guvutɛ kũ ò tà ari Aranↄo Mↄabunↄ bùsu lɛ́zɛkin.
16Bona gwe dↄ ò gɛ̀ɛ Lↄ̀gↄ, gu kũ Dikiri pìn Musanɛ: Ǹ gbɛ̃nↄ kakara mà í kpáḿma.
17Gwen Isarailanↄ lɛ̀ díkĩna sìn: Í bo lↄ̀gↄn, gbasa ò lɛ̀ sínɛ,
18lↄ̀gↄ kũ ó don'arɛdenↄ yↄ̃̀ kũ línↄ, lↄ̀gↄ kũ kínɛnↄ pà kũ ń gònↄ. Bona gbárannan ò gɛ̀ɛ Matana.
19Matana gbɛra Naliɛli, Naliɛli gbɛra Bamↄ.
20Bamↄ gbɛra guvutɛ kũ à kú Mↄabunↄ bùsun, gu kũ Pisiga mìsↄ̃ntɛ arɛ dↄ gbárannaa.
21Isarailanↄ gbɛ̃nↄ zĩ̀ Amↄrinↄ kína Siↄ̃a ò pì:
22Ǹ ó gba zɛ́ ò gɛ̃tɛ n bùsuua. Óni pã buranↄ ke geepi líkpɛlaro, óni á lↄ̀gↄ'i miro. Ónigↄ̃ tɛ́ kína zɛ́da gũmmɛ ari ò gɛ́ gɛ̃tɛo n bùsula.
23Siↄ̃ dí ń gba zɛ́ ò gɛ̃tɛ a bùsuuaro. À a zĩ̀karinↄ kàkara ń pínki, ò bↄ̀tɛ òtɛn gɛ́ńyĩ gbárannan. Kũ ò kà Yaza, ò zĩ̀i kà kũ Isarailanↄ,
24akũ Isarailanↄ ń dɛdɛ kũ fɛ̃nɛdao ò ń bùsuu sìḿma zaa Anↄ ari Yabokui Amↄninↄ bùsun, zaakũ Amↄninↄ bùsu lɛ́zɛki pì pãsĩ, àdi sí gɛ̃nlo.
25Isarailanↄ Amↄri wɛ̃tɛnↄ sì pínki kũ Ɛsɛbↄ̃o kũ a lakutunↄ pínki, akũ ò vùtɛn.
26Ɛsɛbↄ̃mɛ Amↄrinↄ kína Siↄ̃ wɛ́ra ũ. Siↄ̃ zĩ̀i kà yã kũ Mↄabunↄ kína káakuo, akũ à a bùsuu sìa ari Anↄ swai.
27Abire yãin kɛrɛnↄ dì pi: À mↄ́ Ɛsɛbↄ̃, ò Siↄ̃ wɛ́ra pì kɛkɛ ò kátɛ!
28Tɛ́ bò Ɛsɛbↄ̃ yã, zĩ̀karinↄ bò Siↄ̃ wɛ̃tɛ pìi gũn, ò Mↄabunↄ bùsu wɛ́ra Ara kàkatɛ Anↄ mìi sĩ̀sĩ gbɛ̃ pìnↄ.
29Waiyoo Mↄabunↄ! Kɛmↄsi gbàgbarinↄ, a kakatɛmɛ! Kɛmↄsi tò á gↄ̃gbɛ̃nↄ fã̀kↄ̃a, à á nↄgbɛ̃nↄ kpà Amↄrinↄ kína Siↄ̃a zĩ̀zↄnↄ ũ.
30Akũ o ń fú, o ń dɛdɛ zaa Ɛsɛbↄ̃ ari Dibↄ̃. O ń kákatɛ ari Nↄfa kũ Mɛdɛbao.
31Lɛn Isarailanↄ vùtɛ Amↄrinↄ bùsun lɛ.
32Musa gbɛ̃nↄ zĩ̀ Yaza asiri gwa, akũ Isarailanↄ gwe sì kũ a lakutunↄ pínki, ò pɛ̀ Amↄri kũ ò kú gwenↄa.
33Akũ Isarailanↄ lìtɛ ò Basã zɛ́ sɛ̀. Akũ Basã kína Ogu gɛ̀ɛńyĩ kũ a zĩ̀karinↄ ń pínki ò zĩ̀i kà kũńwo Ɛdɛrɛi.
34Dikiri pì Musanɛ: Ǹsun vĩna kɛnɛro, zaakũ ma a nànnɛ n ↄĩ kũ a gbɛ̃nↄ kũ a bùsuuo pínki. Ǹ kɛnɛ lákũ n kɛ̀ Amↄrinↄ kína Siↄ̃ kũ à kí blè Ɛsɛbↄ̃nɛ nà.
35Akũ ò Ogu dɛ̀ kũ a nɛ́nↄ kũ a zĩ̀karinↄ ń pínki, bee gbɛ̃ mɛ̀n do dí boro, akũ ò a bùsuu pìi sì.
NARONAA 21
NARONAA 21:4-35