NARONAA 14:4-20

⁴Akũ ò pìkↄ̃nɛ: Ò don'arɛde bo ò ɛra ò tá Misila.

⁵Musa kũ Harunao wùtɛ ń nɛ̀sɛlɛ kutɛna pari arɛ.

⁶Akũ bùsuyakɛrinↄ gbɛ̃nↄn pla Nuni nɛ́ Yↄsua kũ Yefunɛ nɛ́ Kalɛbuo ń utanↄ gàga ò kɛ̃̀kɛ̃

⁷ò pì gbɛ̃nↄnɛ: Bùsu kũ o bↄtɛn o yakɛ̀ɛ pì mana manamana.

⁸Tó ó yã kà Dikirigu, ani gɛ́ kũoo bùsuu pìn, bùsu kũ vĩ kũ zↄ́'io din pìia, à ó gba.

⁹Àsun bo Dikiri kpɛro. Àsun vĩna kɛ bùsupidenↄnɛro, zaakũ ó pↄ́blenↄmɛ, ò utɛki vĩ doro. Dikiri kú kũoo, àsun vĩna kɛro.

¹⁰Gbɛ̃ sĩnda pínki tɛni pi ò ń pápa kũ gbɛ̀ɛo, akũ Dikiri gakuri bò à sù Isarailanↄa dakarɛki kuta kia.

¹¹Dikiri pì Musanɛ: Gbɛ̃ pìnↄ nigↄ̃ ma gya bo gↄrↄ sĩnda pínkin yá? Bee kũ daboyã dasi kũ ma kɛ̀ ń tɛ́nↄ, onigↄ̃ gí ma náani kɛi gↄrↄ sĩnda pínkin yá?

¹²Mani gagagyã káńyĩ mà ń kakatɛ, mani n burinↄ kɛ dasi, ń gbãna nigↄ̃ de gbɛ̃ pìnↄla.

¹³Akũ Musa pì Dikirinɛ: Mↄkↄ̃n mɛ́ n gbɛ̃ pìnↄ bↄ̀tɛ Misila kũ n gbãnao. Tó Misilanↄ mà,

¹⁴oni gí o bùsu dí denↄnɛiro. Zaakũ ò dↄ̃ kũ ń kú kũoo, ndì bo ǹ suwá tɛ̃tɛ̃ntɛ̃. Ò dↄ̃ kũ n tɛ́luku dìgↄ̃ kú ó musu, ndì dowɛrɛ arɛ a gũn fãnantɛ̃, gwãani sↄ̃ tɛ́ gũn.

¹⁵Tó n gbɛ̃ pìnↄ dɛ̀ kãnto gↄ̃̀nↄ, buri kũ ò yã pìi mànↄ ni pi:

¹⁶Dikiri fùa à gɛ́ kũ gbɛ̃ pìnↄ bùsu kũ à la dàńnɛn, abire yãin à ń dɛdɛ gbárannan.

¹⁷Dikiri, ǹ n gbãna zↄ̃kↄ̃ mↄńnɛ sà, lákũ n ò nà n pì

¹⁸ndì pↄ fɛ̃ likalikaro, ń gbɛ̃kɛ vĩ zↄ̃kↄ̃, ndì gbɛ̃nↄ yã vãninↄ kũ ń taarinↄ kɛ̃ḿma, ama ndì tó taaride bò pãro. Ndì denↄ yã vãninↄ wí ń burinↄ musu ari à gɛ́ à pɛ́ ń sãkpɛnↄa kũ ń nasionↄ.

¹⁹Lákũ n sùruu kɛ̀ kũ gbɛ̃ pìnↄo nà zaa Misila ari ò gɛ̀ɛ ò kào la, ǹ ń durunna kɛ̃ḿma n gbɛ̃kɛ zↄ̃kↄ̃ↄ gũn.

²⁰Akũ Dikiri pì: Lákũ n wɛ́ kɛ̀ma nà, mani sùru kɛ kũńwo.