NARONAA 10:6-22

⁶Tó ò a gɛ̃̀n plade pɛ̀ kũ yĩsãmpanaao, gbɛ̃ kũ ń bùra kú gɛ̀nↄmidↄki kpanↄ mɛ́ oni bùra futɛ. Kãkãkipɛna kũ yĩsãmpanaao pìimɛ gbɛ̃nↄ dana zɛ́n sèeda ũ.

⁷Tó ò ye ò gbɛ̃nↄ kakara, ògↄ̃ pɛ́ yĩsãmpanaa sari.

⁸Haruna nɛ́ sa'orinↄ mɛ́ oni kãkãki pìnↄ pɛ́. Anigↄ̃ deárɛ doka ũ gↄrↄ sĩnda pínki, ákↄ̃nↄ kũ á burinↄ.

⁹Gↄrↄ kũ a ka á bùsun, tó átɛn gɛ́ zĩ̀ ká kũ á ibɛrɛ kũ oni sù ò futɛ kãáonↄ, àgↄ̃ kãkãki pìnↄ pɛ́ kũ yĩsãmpanaao, de á yã le à dↄ makũ Dikiri á Ludagu, mani á bo á ibɛrɛɛ pìnↄ ↄĩ.

¹⁰Gↄrↄ kũ átɛn pↄnna kɛ sↄ̃, dikpɛn yá, mↄ dufu gↄrↄ káaku zĩn yá, àgↄ̃ kãkãki pìnↄ pɛ́ á sa'opↄ kũ òdi ká tɛ́n à tɛ́ kũnↄa kũ á sáabukpana sa'opↄnↄ, á yã ni dↄmagu. Makũmɛ Dikiri á Luda ũ.

¹¹Wɛ̃̀ plade mↄ plade gↄrↄ barode zĩ, tɛ́luku gò sèeda kutala,

¹²akũ Isarailanↄ bùraa fùtɛ Sinai gbárannan, òtɛn bùra sↄ̃sↄ̃ ari tɛ́luku gɛ̀ɛ à zɛ̀ Parani gbárannan.

¹³Ń bùra futɛna káakun gwe. Ò kɛ̀ lákũ Dikiri dà Musanɛ à òńnɛ nà.

¹⁴Yuda zĩ̀karinↄ mɛ́ ò bùraa fùtɛ gã̀ kũ gã̀ao káaku kũ ń tutaao. Aminadabu nɛ́ Nasↄ̃mɛ ń don'arɛde ũ.

¹⁵Zua nɛ́ Nɛtanɛlimɛ Isaka zĩ̀karinↄ don'arɛde ũ.

¹⁶Eloni nɛ́ Ɛliabumɛ Zɛbuluni zĩ̀karinↄ don'arɛde ũ.

¹⁷Gɛsↄmu burinↄ kũ Mɛrari burinↄ kuta pìi gbòro, akũ ò sɛ̀ ò dào zɛ́n.

¹⁸Akũ Rubɛni zĩ̀karinↄ bùraa fùtɛ gã̀ kũ gã̀ao kũ ń tutaao. Sedeu nɛ́ Ɛlizumɛ ń don'arɛde ũ.

¹⁹Zurisadai nɛ́ Selumiɛlimɛ Simɛↄ zĩ̀karinↄ don'arɛde ũ.

²⁰Dɛwɛli nɛ́ Ɛliasafamɛ Gada zĩ̀karinↄ don'arɛde ũ.

²¹Akũ Koa burinↄ Luda pↄ́nↄ sɛ̀ ò dào zɛ́n. Ò kuta pìi dↄ̀ ari ògↄ̃ ká.

²²Akũ Ɛflaimu zĩ̀karinↄ bùraa fùtɛ gã̀ kũ gã̀ao kũ ń tutaao. Amiudu nɛ́ Ɛlisamamɛ ń don'arɛde ũ.