1Dikiri yã ò Musanɛ à pì:
2Ǹ kãkãki pi mɛ̀n pla kũ andurufu kũ ò gbɛ̃̀gbɛ̃ manamanao gbɛ̃nↄ kakarabↄ ũ de ò bùra futɛ.
3Tó ò kãkãki pìnↄ pɛ̀, gbɛ̃nↄ ni su ò kakaranyĩ ń pínki dakarɛki kpɛ́lɛlɛa.
4Tó kãkãki mɛ̀n don ò pɛ̀, Isaraila buri don'arɛde kũ ò de kína ũnↄ mɛ́ oni su ò kakaranyĩ.
5Tó ò kãkãki pìnↄ pɛ̀ kũ yĩsãmpanaao, gbɛ̃ kũ ń bùra kú ifãboki kpanↄ mɛ́ oni bùra futɛ káaku.
6Tó ò a gɛ̃̀n plade pɛ̀ kũ yĩsãmpanaao, gbɛ̃ kũ ń bùra kú gɛ̀nↄmidↄki kpanↄ mɛ́ oni bùra futɛ. Kãkãkipɛna kũ yĩsãmpanaao pìimɛ gbɛ̃nↄ dana zɛ́n sèeda ũ.
7Tó ò ye ò gbɛ̃nↄ kakara, ògↄ̃ pɛ́ yĩsãmpanaa sari.
8Haruna nɛ́ sa'orinↄ mɛ́ oni kãkãki pìnↄ pɛ́. Anigↄ̃ deárɛ doka ũ gↄrↄ sĩnda pínki, ákↄ̃nↄ kũ á burinↄ.
9Gↄrↄ kũ a ka á bùsun, tó átɛn gɛ́ zĩ̀ ká kũ á ibɛrɛ kũ oni sù ò futɛ kãáonↄ, àgↄ̃ kãkãki pìnↄ pɛ́ kũ yĩsãmpanaao, de á yã le à dↄ makũ Dikiri á Ludagu, mani á bo á ibɛrɛɛ pìnↄ ↄĩ.
10Gↄrↄ kũ átɛn pↄnna kɛ sↄ̃, dikpɛn yá, mↄ dufu gↄrↄ káaku zĩn yá, àgↄ̃ kãkãki pìnↄ pɛ́ á sa'opↄ kũ òdi ká tɛ́n à tɛ́ kũnↄa kũ á sáabukpana sa'opↄnↄ, á yã ni dↄmagu. Makũmɛ Dikiri á Luda ũ.
11Wɛ̃̀ plade mↄ plade gↄrↄ barode zĩ, tɛ́luku gò sèeda kutala,
12akũ Isarailanↄ bùraa fùtɛ Sinai gbárannan, òtɛn bùra sↄ̃sↄ̃ ari tɛ́luku gɛ̀ɛ à zɛ̀ Parani gbárannan.
13Ń bùra futɛna káakun gwe. Ò kɛ̀ lákũ Dikiri dà Musanɛ à òńnɛ nà.
14Yuda zĩ̀karinↄ mɛ́ ò bùraa fùtɛ gã̀ kũ gã̀ao káaku kũ ń tutaao. Aminadabu nɛ́ Nasↄ̃mɛ ń don'arɛde ũ.
15Zua nɛ́ Nɛtanɛlimɛ Isaka zĩ̀karinↄ don'arɛde ũ.
16Eloni nɛ́ Ɛliabumɛ Zɛbuluni zĩ̀karinↄ don'arɛde ũ.
17Gɛsↄmu burinↄ kũ Mɛrari burinↄ kuta pìi gbòro, akũ ò sɛ̀ ò dào zɛ́n.
18Akũ Rubɛni zĩ̀karinↄ bùraa fùtɛ gã̀ kũ gã̀ao kũ ń tutaao. Sedeu nɛ́ Ɛlizumɛ ń don'arɛde ũ.
19Zurisadai nɛ́ Selumiɛlimɛ Simɛↄ zĩ̀karinↄ don'arɛde ũ.
20Dɛwɛli nɛ́ Ɛliasafamɛ Gada zĩ̀karinↄ don'arɛde ũ.
21Akũ Koa burinↄ Luda pↄ́nↄ sɛ̀ ò dào zɛ́n. Ò kuta pìi dↄ̀ ari ògↄ̃ ká.
22Akũ Ɛflaimu zĩ̀karinↄ bùraa fùtɛ gã̀ kũ gã̀ao kũ ń tutaao. Amiudu nɛ́ Ɛlisamamɛ ń don'arɛde ũ.
23Pedazu nɛ́ Gamaliɛlimɛ Manase zĩ̀karinↄ don'arɛde ũ.
24Gideoni nɛ́ Abidãmɛ Biliaminu zĩ̀karinↄ don'arɛde ũ.
25Akũ Dã zĩ̀karinↄ bùraa fùtɛ gã̀ kũ gã̀ao kũ ń tutaao. Mↄ́kↄ̃nↄ mɛ́ òdigↄ̃ tɛ́ kpɛkpɛ. Amisadai nɛ́ Ayɛzamɛ ń don'arɛde ũ.
26Ɔkↄrana nɛ́ Pagiɛlimɛ Asa zĩ̀karinↄ don'arɛde ũ.
27Enana nɛ́ Airamɛ Nafatali zĩ̀karinↄ don'arɛde ũ.
28Lákũ Isarailanↄ dì bùra futɛfutɛ ògↄ̃ tɛ́tɛkↄ̃i nàn gwe gã̀ kũ gã̀ao.
29Obabumɛ Musa anzure Ruɛli nɛ́ ũ, Midiã burimɛ. Musa pìnɛ: Ótɛn da zɛ́n ò gɛ́ bùsu kũ Dikiri pì áni ó gban. Ǹ mↄ́ ǹ gɛ́ kũoo, óni yã mana kɛnnɛ, zaakũ Dikiri nnamana gwe lɛ́ sɛ̀wɛrɛ.
30Akũ à pìnɛ: Mani gɛ́ro, mani ɛra ma bùsun ma bedenↄ kĩnaamɛ.
31Musa pì: N yã nna. Ǹsun ó tónlo, zaakũ ń bùrakatɛki mana dↄ̃ akũsↄ̃ mↄkↄ̃n mɛ́ ĩni kɛ ó wɛ́de ũ.
32Tó n gɛ kũoo, óni yã mana kũ Dikiri ni kɛwɛrɛ kɛnnɛ se.
NARONAA 10
NARONAA 10:1-32