Nambas 22:3-13

³Moab biyisi Israel asi koroto si kinani wai si nagara saburere bisuwona Moab biyisi nagara i bobunuisi.

⁴Ba Moab biyisi Midian warawaraetesi kurisi si wona, “Niko koroto kaikapo wawasi sina bomsiri wai bull mekabage gwanewa te kanikani wai nanakasike sina kam pupuna taveyei.” Kona maranai wai Moab biyisi asi taupauma Balak,

⁵kawariyonayona i porai si nae Beor natuna Balaam ana kupura Pethor okowa parinai i mamana wai si yorei. Balak i wona, “Dam Egypt yai si verakasibau ba dobu si bonuwei ba gwabiku ai si kwanatu.

⁶Karaku ke botu nikosi pipiya kuna kaonawaisi kairavina kosi kuriku wai si maragata saki. Memena bage ana getawanisi ba niko kupurai ana kwabina taveyisi. Kairavina a kuiri kata kosi ke bigairenisi wai bibigairenisi ba pipiya ke kaonawaisi wai te paipaiwara.”

⁷Moab biyisi ba Midian biyisi asi warawaraetesi si kawa wai suwarina si yauni ba si tauya Balaam kurina ba Balak awaika i wonei wai, si karaberei.

⁸Balaam kurisi i wona, “Niko pomnai kau kupama kona terei, ba Bada mekabage ina kaobeyiku wai ana wonimi.” Kata Moab babadisi yabata si mana ba si dauwa.

⁹Ba God i botu Balaam kurina ba i wona, “Mekosi pipiya yabata ko mamana?”

¹⁰Balaam God kurina i wona, “Moab biyisi asi taupauma Zippor natuna Balak niko wara i porai kuriku.

¹¹‘Dam Egypt yai si verakasibau ba dobu si bonuwei. Karaku ke botu kairaviku kuna kaonawaisi. Memena bage karaku mosi animsi beyisi ba niko kupurai ana kwabinisi sina kasibau.’”

¹²Saba God Balaam i wonei, “Kega yabata kona nae. Ba kega kuna kaonawaisi kairavina Yauku, ai gairenisi.”

¹³Balaam didibarai i bomsiri ba Balak ana babadisi i wonisi, “Ko veramaga ami ku kupura kairavina Bada i gesiku kega yabata tana nae.”