Namba 24:7-19

⁷Êsêacnêŋ kôm moŋa êpô lêna bu atom, gebe bu oc êpoac kôm ŋalêlôm. Êsêacnêŋ kiŋ kapôêŋ kêlêlêc Agag su ma tetoc ênê gôliŋ kiŋŋa ŋawae sa êlêlêc su.

⁸Anôtô, taŋ gêwê eŋ gêwi Aiguptu siŋ naŋ, kêkêŋ ŋaclai gêdêŋ eŋ kêtôm bôcgabuŋ tojabo. Eŋ oc êndaŋgôŋ lau tomôkê-tomôkê, taŋ têtu ênê ŋacjo naŋ, ma oc êtuc nêŋ ŋatêkwa e popoc-popocgeŋ, ma nê sôb oc eseŋeŋ nêŋ ŋacjo.

⁹Eŋ kêluŋ tau gêc kêtôm lewe, kêtôm lewe têna. Asa gebe êkalom e êndi sa. Ma ŋac, taŋ êpuc boa aôm naŋ, êtap êpuc boa aôm ŋagêjô sa.”

¹⁰Go Balak têtac ŋandaŋ kêsa gêdêŋ Bileam, tec kêtuc lêma kêpi tau ma kêsôm gêdêŋ Bileam gebe “Aê kakalem aôm, gebe ôpuc boa ŋoc ŋacjo, mago aôm gôjam mec êsêac kêtu dim têlêac.

¹¹Ôêc su, ômu ôna nêm gamêŋ. Aê gabe jatoc aôm sa, mago Apômtau tau kêgamiŋ aôm waem.”

¹²Bileam gêjô eŋ awa gebe “Aê kasôm gêdêŋ nêm lau jaeŋŋa, taŋ kôsakiŋ dêdêŋ aê sêmêŋ naŋ, su gebe

¹³‘Silber to gold embe êsô Balaknê andu e mêŋêc, gebe êkêŋ êndêŋ aê, mago jatôm gebe jaŋgêli Apômtaunê biŋ atom. Aê oc jaŋgôm sec to ŋajam êtôm ŋoc ŋalêlôm êkac aêŋa jatôm atom amboac tonaŋgeŋ. Aê jasôm biŋ tageŋ, taŋ Apômtau kêsôm naŋgeŋ.’

¹⁴Ma galoc jamu jandêŋ ŋoc lau jana êtiam. Amboac tonaŋ ômôêŋ gebe jasôm biŋ, taŋ lau tônê sêŋgôm êndêŋ nêm lau êtu ŋamu naŋ, lasê êndêŋ aôm.”

¹⁵Ma Bileam gêôc awa sa ma kêsôm nê biŋ tau gebe “Beor latu Bileam, ŋac, taŋ mata gêlac naŋ, nê biŋ tonec.

¹⁶Ŋac, taŋ gêŋô Anôtônê biŋ to kêjala Lôlôc Ŋatau nê kauc ma gêlic gêŋ, taŋ Ŋaniniŋ Ŋatau geoc lasê naŋ, e gêu tau jagêc tomata gêmôbgeŋ atom naŋ, nê biŋ tonec.

¹⁷Aê galic ŋac tau, mago gêmoa galoc atom. Matoc gê eŋ, mago gêmoa ŋagala atom. Utitalata teŋ oc mêŋêpi aŋga Jakobnê, ma tôc gôliŋŋa teŋ mêŋêsa aŋga Israelnê. Ma tôc tau êtuc lau Moab teŋbeleŋ to êku Set latui samob tulu.

¹⁸Gamêŋ Edom oc êtu ênê gêŋ, ma eŋ êjaŋgo nê ŋacjo Seir nêŋ gamêŋ su, ma Israelnê ŋaclai êsa.

¹⁹Jakob ênam gôliŋ nê ŋacjo ma enseŋ lau, taŋ sêsêp siŋ sawa naŋ su.”