Namba 23:16-26

¹⁶Ma Apômtau mêŋgêlic Bileam ma kêkêŋ biŋ kêsêp eŋ awasuŋ ma kêsôm gebe “Ômu ôndêŋ Balak ôna ma ôsôm biŋ tonec.”

¹⁷Go Bileam gêmu gêdêŋ Balak gêja ma Balak to lau Moab nêŋ kasêga samob sêkô sêwiŋ ênê daja. Ma Balak kêsôm gêdêŋ eŋ gebe “Apômtau kêsôm biŋ amboac ondoc.”

¹⁸Go Bileam gêôc awa sa ma kêsôm nê biŋ tau gebe “O Balak, ôndi ma ôŋô biŋ. O Sipor latu, ôkêŋ taŋam aê.

¹⁹Anôtô eŋ ŋamalac atom, gebe ênsau biŋdansaŋ. Eŋ ŋamalac teŋ latu atom, gebe ênam nê biŋ ôkwi. Biŋ, taŋ eŋ kêsôm naŋ, gêgôm kêtu anô atom me. Biŋ, taŋ eŋ gêjac mata naŋ, gêgôm ŋanô kêsa atom me.

²⁰Ôlic acgom, eŋ kêjatu aê gebe janam mec. Eŋ gêjam mec su, tec katôm, gebe janam mec tau ôkwi atom.

²¹Gêŋwapac teŋ gêc Jakob ŋalêlôm atom, ma ŋakeso teŋ gêc Israel ŋalêlôm atom amboac tonaŋgeŋ. Nê Anôtô gêmoa gêwiŋ eŋ ma lasê kêtaŋ kêtu ênê kiŋŋa.

²²Anôtô, taŋ gêwê eŋ gêwi Aiguptu siŋ naŋ, kêkêŋ ŋaclai gêdêŋ eŋ kêtôm bôcgabuŋ ŋajabo.

²³Biŋ beŋŋa teŋ kêtôm gebe enseŋ Jakob atom, ma biŋ sêpuc boaŋa teŋ enseŋ Israel atom. Galoc sêsôm kêpi Jakob to Israel gebe ‘Anôtô gêgôm gêŋsêga kaiŋ teŋ.’

²⁴Alic lau tau acgom. Êsêac têtôm lewe têna gêdi sa. Êsêac têtôm lewe kêpuc tau gêdi kêkô. Eŋ êlêwaŋ tau atom e êniŋ gwada su ma ênôm gwada, taŋ gêjac naŋ, ŋadec.”

²⁵Go Balak kêsôm gêdêŋ Bileam gebe “Aôm kôpuc boa êsêac atom, tec ônam mec êsêac atom amboac tonaŋgeŋ.”

²⁶Bileam gêjô eŋ awa ma kêsôm gêdêŋ Balak gebe “Biŋ samob, taŋ Anôtô kêjatu naŋ, aê oc jaŋgôm ŋanô êsa. Aê kasôm biŋ tonec gêdêŋ aôm me masi.”